Zergetatik iazko garai berean baino %10 gutxiago bildu du Gipuzkoako Foru Aldundiak aurtengo lehen lauhilekoan. Hala jakinarazi zien Helena Franco Ogasun diputatuak Gipuzkoako alkateei, joan den asteartean aldundiaren egoitzan egindako bileran.

Jaitsiera horrek zuzenean eragiten die udalei; izan ere, Udalen Finantzaketarako Foru Funtsaren ekarpenaren kopurua datu horien araberakoa da. Eta horrenbestez, horren arabera, urtearen amaieran litekeena da udalek diputazioari dirua itzuli behar izatea. Negatiboak dira datuak, eta, horregatik, datuak jakitera ematearekin batera, Francok “zuhur” jokatzeko eskatu die alkateei. “Egiturazko terminoetan” ekiteko eskatu die, eta “sistema fiskalaren oinarriak” aldatzeko beharra azpimarratu du. Egoera dena izanik ere, foru funtsa %0,5 handitzeko asmoarekin jarraitzen duela berretsi du, hala ere, Ogasun diputatuak

Udal zergetan aldaketak egiteko Foru Arau Proiektua ere hizpide izan dute aste honetako bileran. Francoren arabera, proiektu hori “oso garrantzitsua” da udalen diru sarrerak “indartzeko”. Aldaketa horrek udalei jarduera ekonomikoei zein ondasun higiezinei dagozkien zergak igotzea ahalbidetuko lieke. Orain, Gipuzkoako Batzar Nagusietan dago gaia, eta besteak beste, bigarren etxebizitzari dagokion zerga %150 igotzeko aukera aurreikusten du behin-behineko dokumentuak.

Zerga bilketaren datuei buruz hitz egiteko otsailean bildu ziren azkenekoz aldundia eta Gipuzkoako herrietako alkateak. Orain, irailaren amaierarako beste hitzordu bat jarri dute.