Irungo alarde parekideak eta Hondarribiko Jaizkibel konpainia mistoak 2011ko Berdintasunaren Emakunde saria jaso zuten. Joan den apirilaren 24an eman zieten saria, Donostiako Kursaal jauregian antolatutako ekitaldi batean. Jaizkibelen izenean Anabel Salinas konpainiako kapitainak jaso zuen saria, eta Irungo alarde parekidea ordezkatuz Txaro Arribasek. Irundarrak “hamasei urteetako borroka” izan dela gogoratu zuen: “Ausartak ginen, gazteak, eta ez genekien zer-nolako indarra genuen gure aurka. Ikusi dugu ez dela aski legea alde izatea”. Hartara, Emakunderi eskerrak eman zizkion: “Badakigu ez dela erraza eta erosoa izan guri saria ematea”.