Hamargarren urteurrenaren harira, atzetik daukan komunitatearekin eskuz esku aritzeaz gain, euskal kultur produkzioari ere egin nahi dio ekarpena BERRIAk. Hala, ospakizunetarako antolatutako 30 emanaldietako hamabitan, Zertarako hegoak antzezlana ikusteko aukera izango da. “BERRIAren ekimenez Metrokoadroka Sormen Laborategiak sortutako obra da”, Ainara Lasa BERRIA taldeko marketin arduradunak zehaztu duenez.

Antzezlana ahalik eta aldi gehienetan eskaintzea da asmoa: “Propio horretarako sortutakoa delako, eta ahalik eta emanaldi gehien eskaintzea garrantzitsua iruditzen zitzaigulako”. Antzezlan horrek, baina, ez du propio BERRIAz hitz egiten.

Metrokoadroka-ren estiloan

Iazko uda aurretik BERRIAren proposamena jaso bezain laster hasi ziren “gogoz” lanean kolektiboko kideak, Oier Guillan zuzendariak jakinarazi duenez.

Izan ere, gertukoa dute BERRIA proiektua: “Euskaraz lan egiten dugun heinean, ez dago espazio asko gure lanen berri emateko. BERRIAren gisako hedabide bat gakoa da guretzat, gure lana plazaratzeko eta kultura euskaraz bizi duen jendearengana iristeko”.

Horrez gain, taldearen planteamendua bat zetorren eurek lan egiteko duten moduarekin. BERRIAk ideia eman zien, baina sorkuntza propiorako tartea utzita; ez du prozesuan parte hartu. “Gu kolektibo bat gara, eta BERRIAren atzetik dagoena ere kolektibo edo komunitate bat da. Beraz, transmititu nahi den mezuari begira, esan dezakegu gutasun hori, kolektiboaren zentzu hori, presente dagoela proiektu honen alderdi guztietan”, dio Guillanek.

Komedia

Zertarako hegoak komedia bat da; “umore eta jolas asko dago”, Guillanek aurreratu duenez. BERRIAren irakurleria zabala dela pentsatuta egin dute horrela.

Hauxe da ildo nagusia: “Pertsonaietako batek superbotere bat duela deskubritu du: hegoak ditu. Baina hego horiek ez dute hegan egiteko balio. Azken finean, gizartean horixe gertatzen da. Denok dugu boterea zerbait egiteko, baina badirudi ez duela ezertarako balio”.