Bederatzi urte zituela hasi zen Amaia Iturriotz (Urretxu, 1993) Urretxu-Zumarragako bertso eskolan. Bertan bizitza erdia eman du, eta oraindik orain ere han jarraitzen du. Ikasle izateari utzi gabe, irakasle lanetan ere badabil, berari irakatsitakoa beste batzuei itzultzeko asmoz, hark esan duenez. Bertso eskola bizitza eskola izan da Iturriotzentzat ere, bertsotan ikasteko ez ezik, beste balio batzuk ezagutzeko eta horiek barneratzeko gunea ere izan baita harentzat.

Bederatzi urte zenituela hasi zinen bertso eskolan.

Bai. Hasieran ez nuen serio hartu; ondo pasatzeko modu bat zen niretzat, aisialdia beste modu batean pasatzekoa. Denborarekin gustua hartu nion, eta, oraindik ere, 20 urterekin bertso eskolen munduari lotuta jarraitzen dut.

Nola?

Ikasle izateari utzi gabe. Urretxu-Zumarragako bertso eskolan 9 eta 11 urte arteko haurrekin irakasle lanetan nabil. Ostiral arratsaldetan ematen ditugu klaseak, eta aurtengo ikasturtea da lehenengoa. Niri urte hauetan guztietan irakatsi didatena bueltan emateko modu bat dela iruditzen zait.

Baina irakasle lana Urretxu-Zumarragatik kanpora ere egiten duzu.

Bilbon ikasten dudanez, helduez osatutako talde batekin ere banabil han irakasle lanetan. Euskaraz mintzatzeko, euskara erabiltzeko modu bat ere bada guztiontzat. Oso gustura nabil. Horretaz gainera, Santutxuko bertso eskolara ere joaten naiz, bertsotan egitera.

Nolako bilakaera izan du zugan bertsoarekiko duzun zaletasunak?

Hasieran jolas moduan hartu nuen, esan bezala; baina denborarekin zerbait serioagoa bihurtuz joan zen. Gaur egun ere zaletasuna da niretzat, aisialdiaz gozatzeko dudan modu bat. Orain lehen baino denbora gehiago eskaintzen diot zaletasun horri.

Zaletasun horretaz gain, zer eman dizu zuri bertso eskolak?

Bertso eskola bertsotan ikasteko leku bat baino gehiago izan da niretzat. Beste zenbait balio irakatsi dizkit, eta horiek barneratzen ikasi dut. Besteekiko harremanetan sakontzeko aukera eman dit, nire lagun taldea oso gaztetatik irekitzen eta herrian nahiz kanpoan jende ezberdina ezagutzen.

Zer da bertso eskola zuretzat?

Esan dudanaz gain, bertso eskola euskara tresna gisa erabiltzeko eta jolas moduan aurkezten den leku bat da. Lagun artean egoteko eta ongi pasatzeko gunea ere bada.

Zer eragin izan dute bertso eskolek bertsogintzan?

Bertso eskolek bertsotan egiteko teknikoki oso ongi prestatutako bertsolariak zaildu dituzte. Garai batekoek izan ez zuten irakasbidea izan dugu belaunaldi berriek. Bestalde, bertsolarien beren eta bertsolaritzaren homogeneizazioaz ere hitz egin litekeela esango nuke. Egun, oholtza gainean gabiltzan bertsolari gehienak bertso eskoletatik gatoz.

Pasaiako Bertso Eskolen Egunean parte hartuko duzu?

Bai, Urretxu-Zumarragako bertso eskolakoekin joango naiz.