Bertsoak eta musika uztartzen ditu Bi bala ikuskizunak. Herriz herri dabiltza Iñaki Gurrutxaga, Aitzol Barandiaran eta Julen Goikoetxea emanaldia eskaintzen, eta gaur Andoainen izango dira. 22:30ean hasiko da saioa, Irunberri tabernan. Emanaldi guztiak ezberdinak izaten dira, doazen herrirako propio sortutako hitzak eta doinuak egiten baitituzte. Iazko Bertso Egunerako Gurrutxagak eta Barandiaranek sortutako pieza batetik abiatu zen proiektua; krisia gaitzat hartu eta The Beatles taldearen hainbat kanta moldatu zituzten. Arrakasta lortu zuen ikuskizunak. Oraingoan ere, gaur-gaurko gaiei egiten diete erreferentzia, umorez, ironiaz.