Euskal Herrian zehar bira arrakastatsu bat egitea zuten amets, ehunka ikusle espero zituzten, txalo zaparradak entzuteko irrikan zeuden… Baina bakarrik geratu dira. Zirkua salgai jarri dute, eta azken emanaldia prestatuko dute. Ion Martinez (Donostia, 1980) eta Saioa Royo (Donostia 1975) aktoreek interpretatuko dute Azken eta Xorroxin pailazoen azken emanaldia, Usurbilen. Aldatzen Laguntzen konpainiako kideek zirku bihurtuko dute Aginagako eliza zaharra, Amets zirkoa salgai! obra aurkeztuko baitute han. 20:30ean hasiko da ikuskizuna.