Entzule gisa gogoan duzun lehen irratsaioa?
Gogoratzen naiz ikastolatik bueltan entzuten nuela Herri Irratiko umeentzako saio bat, Txaro Arteagak eta Xabier Otaegik egiten zutena; Sei terdietako trena izena zuen.
Irratsaio bat?
Asko gogoratzen dut Kostaldeko trena, Martin Tejeriak Euskadi Irratian arratsaldeetan egiten zuen saioa. Urte asko eman nituen saio hori entzunez eta gozatuz.
Esatari bat?
Jaime Otamendi eta Arantxa Iturbe izan ziren, neurri handi batean, nire irakasleak. Izugarri ikasi nuen haiekin.
Egin ez duzun eta gustura egingo zenukeen saio bat?
Lehiaketa bat, esaterako; egin izan ditut, baina egingo nuke beste bat gustura. Edo gaueko saio bat; iruditzen zait jendeak oraindik ere baduela lo hartu aurretik irratia burkoaren azpian pizteko ohitura.
Irrati esatari batek inoiz ezin du…
Elkarrizketatuak baino gehiago hitz egin.
Irrati esatari batek beti izan behar du kontuan…
Entzulea; haren larruan jarri behar du beti.
Kazetari ez bazina, zer?
Gaur egun ia ez dago halakorik, baina gustura egingo nuke lan disko denda batean.