Pasaiako segada jazo zela 32 urte beteko dira. Gertatutakoaren inguruko auziak hainbat gorabehera izan du urte guztiotan.
1984
Martxoa. Komando Autonomo Antikapitalistetako lau kide hil zituen Espainiako Poliziak Pasaiako badian: Dionisio Aizpuru Kurro eta Pedro Mari Isart Pelitxo azpeitiarrak, eta Rafael Delas Txapas eta Jose Maria Isidro Izura Pelu iruindarrak. Joseba Merino donostiarra —segadatik bizirik atera zen kide bakarra— eta Rosa Jimeno oriotarra atxilotu zituzten.

1986
Ekaina. Auzia behin-behinean itxi zuen Calvo Rojas epaileak, delitu frogarik ez zegoela argudiatuta.

2000
Maiatza. Kasua aztertzen hasi zen Santiago Gonzalez abokatua, eta hainbat dokumentu falta zela jabetu zen: artxibatze autoa eta Merinori hartutako deklarazioa. Donostiako Lurralde Auzitegiak sumarioa berriz ireki zezan lortu zuten.
Iraila. Merinori Pasaian gertatutakoaz deklarazioa hartu zioten, Santoñan preso zela (Kantabria, Espainia).

2001
Urtarrila. Pasaiako Sarraskia Argitu taldeak eskatuta, Azpeitiko Udalak herri akusazio aurkeztea erabaki zuen, Miguel Castells abokatu hartuta.
Martxoa. Rosa Jimenok deklaratu zuen epaitegian.
Maiatza. Hildakoei autopsia egin zien Francisco Etxeberria auzi medikuak deklaratu zuen. Bat zetozen hark eta Merinok esandakoak.

2004
Ekaina. Epaitegiak artxibatu egin zituen eginbideak. Familiak eta Azpeitiko Udalak helegitea aurkeztu zuten.

2005
Ekaina. Gipuzkoako Auzitegiak auzia berriz zabaldu zuen.

2016
Otsaila. Auzia artxibatu zuen  Donostiako 2. Instrukzio Epaitegiak. Hildakoen familiek eta Azpeitiko Udalak helegite bana aurkeztu zuten.
Martxoa.  Udalak ohiko udalbatzarra egin zuen. EH Bilduk eta EAJk aho batez onartu zuten hildakoen senideek aurkeztutako mozioa.