Atez ateko bilketa sistemari buruzko mezu argi bat zabaldu zuten joan den larunbatean Oiartzun, Hernani, Usurbil eta Antzuolako bizilagunek: “Bizimodu normala egiten segitzen dugu”. Bilketa sistema horri buruz entzuten ari den “gezur erauntsiari” erantzun nahi izan zioten Hernanin bildutako dozenaka herritarrek, eta euren herrietan ezarrita dagoen hondakinen bilketarako sistema “erosoa, garbia eta merkea” dela ziurtatu zuten.