Duela urte batzuetatik, 35 milimetroko proiektore zaharren lekua hartzen ari da zinema digitala. Lehengo gailuetarako, gero eta kopia gutxiago egiten dituzte. Horiek, noski, hiriburuetara eramaten dituzte lehenengo, eta herriak oso atzean geratzen dira. Zenbait lan, gainera, digitalean bakarrik ekoizten hasi dira. Azkoitiko Baztartxo aretoan, izan dute trabarik: “Gabonetan, Asterix eta Obelix maiestatearen zerbitzura filma ematekoak ginen, baina euskarazko bertsioa digitalean bakarrik egin zuten; ondorioz, gazteleraz eman behar izan genuen”, azaldu du Jesus Arrizabalaga Azkoitiko kultur teknikariak. Dagoeneko, hainbat herri txikitan pasatu dira digitalera: Tolosan eta Azpeitian, esaterako.