Osasun egoera “larria” jasan arren, taupaka jarraitzen dute abesbatzen bihotzek. Zailtasunak zailtasun, “zorionez”, badago harrobia hauspoa betetzen segitzeko. “Gazteek gaur egun eskura duten eskaintza zabala aintzat hartuta, asko dira kantatzearen alde egiten dutenak, eta alde horretatik ez dago arazorik”. Hala onartu du Julitxu Gyslingek, Gipuzkoako Abesbatzen Federazioko lehendakariak. Baieztapen horren erakusle da gazteen abesbatzek Zarautzen egingo duten topaketa. Azaroaren 30ean eta abenduaren 1ean, seigarren tailerra egingo dute, Gipuzkoako Abesbatzen Federazioak antolatuta.

14 eta 23 urte arteko gazteek parte hartuko dute tailerrean, eta abesbatza bakoitzetik gehienez hamabost lagun izango dira. Gipuzkoa osoko taldeek bat egingo dute; tartean daude Arrasate, Zegama, Tolosa, Alegia, Zestoa, Bergara, Donostia, Hernani eta Oñatiko gazteen abesbatzak. Gyslingek azaldu duenez, “asmoa da abesbatzetako gazteei beste zuzendari batzuekin kantatzeko aukera ematea, baita bestelako abestiak landu eta beste taldeetako neska-mutilekin kantuan aritzea ere”. Aurtengoan, adibidez, bi zuzendarirekin egingo dute tailerra: Imanol Elizasu Orereta abesbatzakoarekin eta Juan Gainza Iruñeko Gazte Orfeoikoarekin.

Horrelako egitasmoetan parte hartzea erabat positiboa dela iritzi dio Gyslingek, gazteen jardunari begira: “Ezagutzen duten mundua zabaltzeko balio die. Euren abesbatza da ezagutzen dutena, eta halakoen bitartez gauza berrietara egokitzeko erraztasuna eman nahi diegu; zuzentzeko beste modu batzuk ezagut ditzaten, zuzendari guztiak eta lan egiteko moduak ez baitira berdinak”.

Partitura aurreko lana ez ezik, beste hainbat ekintza ere egingo dituzte, “ondo pasatzea” baita beste helburuetako bat. “Kontuan izan behar da gure abesbatzak amateurrak direla, abestearen arrazoi bakarra plazer hutsa dela. Sentsazio hori zaintzen duen edozein ekintzak merezi du”.

Aurten, Body Percussion jarduera izango dute berritasun gisara; horren bitartez, gorputz perkusioa landuko dute Jorge Pacheco perkusionistarekin. Asteburua, beraz, ez da soilik lanerako izango. Guztientzat irekia izango den kontzertu batekin amaituko dute asteburua; Andre Maria Erreginaren parrokian eskainiko dute, 17:30ean.

“Kulturaren beste hainbat arlotan” gertatzen ari den bezala, abesbatzen etorkizuna ere “ez da samurra”, Gyslingek nabarmendu duenez. Abeslari kopuruaren aldetik osasuntsu dagoen arren, bada urteetan eta “ia mundu osoan” mantentzen den gabezia bat: “Mutilen kopurua urria da oraindik”. Horren isla da hurrengo asteko topaketan parte hartuko dutenen kopurua: 70 izango dira neskak, eta hamabi mutilak.