Pasaia

Pasai Donibanen, 24. Musika Jardunaldian murgilduta daude. Itsas Mendi musika taldeak antolatuta, joan den igandean eman hasi zuten zikloa Mugarik Gabeko Txuntxurreroak taldeak. Gaur, Lezoko Musika Eskolako Banda entzuteko aukera izango da San Joan Bataiatzailearen parrokian, 20:15ean —leku horretan egingo diren kontzertu guztiak ordu berean izango dira—. Guztira, hiru kontzertu koral eta bi instrumental antolatu dituzte aurtengo egitarauan.

Asteburuan ez ezik, datozen egunetan ere musika jardunaldiaz gozatzeko aukera izango da. Ekainaren 6an, ostiralarekin, Miarritzeko (Lapurdi) Itsasoa abesbatzak emango du kontzertua. Hurrengo egunean, Donostiako Luberri abesbatza entzuteko aukera izango da. Astebete geroago, ekainaren 14an, Errenteriako Andra Mari Abesbatzaren barruan sortutako Orereta Gazte Abesbatzak eskainiko du kontzertua. Azkenik, ekainaren 15ean, Errenteriako Musika Banda izango da. Kontzertu guztiak San Joan Bataiatzailearen Parrokian izango dira, Errenteriako Musika Bandarena izan ezik: herriko plazan joko du, 13:00etan.

Gainera, Errenteriako bandak 150 urte betetzen ditu aurten, eta hori ospatzeko, Gipuzkoa osora zabalduko den egitaraua osatu dute. Errenteriako Musika Banda 1864. urtean jarri zen martxan, herrian zegoen eta gaur egun oraindik dirauen musika zaletasunari erantzun nahian.

MUSIKA JARDUNALDIA

Noiz. Maiatzaren 18tik

ekainaren 15era bitarte.

Non. San Joan Bataiatzailearen parrokian eta herriko plazan.