Hauteskunde atarian, foru aldundirako hautagaiak elkartu ditu Gipuzkoako Hitza-k eta BERRIAk, Hamaika telebistarekin lankidetzan —gaur emango dute, 22:00etan—. Bost partaideko eztabaida behar zuena lautara gelditu da, EAJko Markel Olanok ez baitu parte hartu. Gipuzkoako Batzar Nagusietako eserlekuak banatzeko hautagai nagusi diren gainerako lau alderdiak, ordea, bertan izan dira: Xabier Olano EH Bilduren ahaldungai nagusia, Denis Itxaso PSE-EEren ahaldungai nagusia, Pello Atxukarro PPren Oria eskualdeko hautagaia eta Josetxo Arrieta Podemos Ahal Dugu-ko kidea. Hainbat gai izan dituzte hizpide, eta eztabaida sustatu beharrik gabe piztu da ika-mika. Lau laguneko mus partida balitz bezala, bakoitzak bere kartak jarri ditu mahai gainean.
XABIER OLANO: “Urrats garrantzitsuak egin ditugu, zerga politika ezkertiar eta aurrerakoiago baten bidetik. Aberastasun eta fortuna handien gaineko zerga azpimarratuko nuke. Zerga aurrerakoia da, logikaz Europa osora zabaldu beharko lukeena. Europan erreferentzia izaten ari da.
“Etorkizunera begira, sozietate zergan egin behar dira urratsak. Egungo egoera erabat injustua da; pertsona fisikoen errenta zergan edozein langilek edo pentsionistak %20-25 ordaintzen du, eta, aldiz, enpresek, sozietateek, irabaziak izan arren, %10 ordaintzen dute batez beste. Zerbitzu publiko kalitatezkoak emateko baliabideak behar baditugu, bakoitzak irabazten duenaren arabera ordaindu beharko du. Espero dut datorren legealdian indar korrelazioa aldekoa izatea”.
DENIS ITXASO: “Gure gizarte eredua mantentzeko, zerbitzu sozialak, hezkuntza eta osasun sistema publikoa mantentzeko, ezinbestekoa da dirua biltzea. Bestetik, politika fiskalak ekonomiari norabidea ematen dio.
“Guk, Patxi Lopez lehendakari zela, autonomia erkidegorako akordio bat eskatu genuen, fiskalitatea hiru lurraldeetan berdina izateko. Ez zen posible izan”.
PELLO ATXUKARRO: “Denok dakigu dirua behar dela gizartearen beharrei erantzuteko; baina diru sarrerak jarduera ekonomikoaren baitan daude, eta horretarako lana ziurtatu behar da, eta horretarako enpresariak beharrezkoak dira. Orduan, zergen bidez lortu behar duguna da oreka bat.
“Nabarmendu nahiko genuke ondasun handien zerga hori. Horrek, diru sarrera gehiago bermatu beharrean, uxatu egiten du dirutza hori daukan jendea, beste toki batzuetan gutxiago ordain dezakeelako”.
JOSETXO ARRIETA: “Beti esaten da Ogasuna guztiok garela, baina herritarrek ez dute parte hartzen ezertan. Herritarrei entzun egin behar zaie, eta fiskalitateari buruz prozesu parte hartzaileak egin.
“Zergak beharrezkoak dira, ongizate gizartea bermatzeko, baina uneotan gehien ordaintzen dugunak langile soilak gara. Aldaketa egin beharko da, gehien duenak gehiago ordain dezan.
“Bestetik, iruzur fiskala dago. Nik ez dakit Gipuzkoan zenbat ogasun ikuskatzaile ditugun, baina agian mereziko luke ikuskatzaile gehiago edukitzea”.
OLANO: “Hasteko, lastima da hemen gaur Markel Olano ez egotea, hark esan baitu aberastasun handien zerga kenduko duela. Baina, fiskalitate ikuspegitik, aberastasunaren zerga bat ezinbestekoa da; bestela, aberats eta behartsuen arteko zuloa gero eta handiagoa da. Eta ez da gure iritzia soilik, Europako ekonomialariak gauza bera esaten ari dira; Thomas Piketty da horren erreferentzietako bat.
“Eta ikuskariena aipatu du Josetxok; justu Gipuzkoa izan da ikuskariak gehitu dituen zerga administrazio bakarra. Iruzur fiskalaren aurka egin, eta 1.500 milioi euro jaso dira lau urteotan”.
ITXASO: “Helburu izan behar du gehiago duenak gehiago ordaintzea, eta horretarako aberastasunaren eta fortuna handien zerga edukitzea komenigarria da. Baina, hortik aurrera, EAEn behintzat, bilatu beharko genuke adostasunerako leku bat. Armonizazioa. Iruditzen zait komenigarria dela arabar eta bizkaitarrekin bat egitea; egon dadila figura fiskal bakarra hiru lurraldeetan, eta ahal bada Nafarroan ere bai. Horretarako gipuzkoarrek bidean zerbait utzi behar badugu, ni prest nago”.
ATXUKARRO: “Gu zergak jaistearen aldekoak gara, filosofiaz. Bestalde, Denisek esan duen bezala, armonizazioa, batasuna, beharrezkoa da, jendea ez uxatzeko”.
ARRIETA: “Denak ados, beraz, armonizazioaren auzian. Bestetik, zergak jaistearena gezur galanta da. Jendeak ulertu behar du zergak beharrezkoak direla”.
OLANO: “Hondakinekin polemika interesatu gehiegi sortu da. Gipuzkoan bikoiztu egin da birziklatze maila; 2011n %20koa zen, eta egun %50ekoa da. Beraz, zentzugabea da, birziklatze tasak handitzen ari direnean, errauste plantaren mamua berpiztu nahi izatea. Gipuzkoak fase hori gainditu du. Guk plangintza oso bat dugu; birziklatzea handitu, ahal den gehiena konpostatu, eta, gero, inerteen biltegi bat egin Osinbeltzen. Hori herritarrak ados badaude, bestela ez. Errauste planta jarri nahi duenak herritarrei galde diezaiela; bestela tranpa da”.
ITXASO: “Zaborren kudeaketan porrota izugarria izan da, eta zulo beltz ekonomiko ikaragarria. Hiru arazo handi ikusten dizkizuet. Batetik, eredu falta. Zaborra, Europak esaten duenez, errekurtso bat da, eta probetxua atera behar zaio, ahalik eta gehien birziklatu ostean. Beraz, Europak dioenaren gainetik, zabortegien eredua mantentzea atzerapauso izugarria da. Egia da birziklatzeak aurrera egin duela, eta hori zorioneko datua da; eskerrak hiri gehienetan edukiontzien sistema mantendu den, horrek lagundu baitu jendeak eroso, garbi eta modu malguan birzikla dezan.
“Bigarrena, kudeaketa arazo bat. Zer gertatzen da zabor organikoarekin? Gipuzkoan, organikoaren zati handi bat Funesera doa, 150 kilometrotara, horrek daukan kostu eta galerarekin.
“Eta hirugarrena, jarrera inpositiboa. Hor erakutsi duzue zuen politika egiteko modua. 70.000 pertsonaren baino gehiagoren aurkako sinadura eduki arren, zuek gainetik pasatu zarete”.
ATXUKARRO: “Ados nago Denisekin. Errauste plantak ondorio onak lor ditzake; argindarra eman dezake, eta, gainera, kutsadura aldetik, ez dira garai batekoak bezain kaltegarriak. Nire ustez, jendeak erabaki behar du, ahal den gehienetan, eta honetan ere galdetu behar zaie herritarrei. Zuek egin al duzue atez atekoaren inguruko galderarik? Ez dut uste”.
ARRIETA: “Gipuzkoak 700.000 biztanle ditu, baina noraino erabaki dezake norberak nahi duena? Zenbait tokitan, Bildu dagoelako, atez atekoa jarri dute, eta beste zenbaitek errauste planta egin nahi dute. Nire galdera da: ezin al da kontsulta bat egin?”.
OLANO: “Hondakinak nola bildu udalek erabakitzen dute, eta eredu ezberdinak jarraitu dira. Herri galdeketak ere egin dira, berme guztiekin: Usurbil, Deba, Mutriku… Inposizio izugarria, ezer izatekotan, errauste planta jartzea litzateke. Espero dut ezetz”.
ITXASO: “Kontu erabat ezberdina da nola jasotzen den eta nola tratatzen den. Egun, Europan gehien birziklatzen duena Austria da; %70 birziklatzen du, eta beste %30ari aprobetxamendu energetikoa ateratzen dio.
“Gai hau oso garrantzitsua da, baita arlo ekonomikoan ere. 90 milioi xahutu dira Gipuzkoan, kontratatuta zeuden azpiegiturak bertan behera uzteko kalte-ordainetan: bankuei, enpresei, Donostiako Udalari beste 10 milioi…”.
OLANO: “Ez da egia kostuarena. Zuk oso ondo dakizu ordaindu behar izan den dirutza aurreko legealdian zuek eta beste batzuk adostu eta blindatu zenituzten kontratuengatik izan dela”.
ATXUKARRO: “Zergatik herri batzuetan galdetu bai eta besteetan ez? Zuek beti zabiltzate galdeketa eskatzen, baina beti zuei egitea tokatzen ez zaizuen toki eta garaietan. Eta herritarrei zerbait galdetzea egokia bada, gaiarengatik, hauxe da”.
OLANO: “Beraz, errauste plantarena galdetuko duzu?”
ATXUKARRO: “Bai, ni prest egongo nintzateke”.
OLANO: “Zu ere bai, Denis?”.
ITXASO: “Bai”.
ARRIETA: “Zerbait aurreratzen ari gara, beraz. Argi dago errauste planta atzera bota zela herriak kontra egin zuelako. Kontsulta dezagun. Agian gipuzkoarrek egingo dute errauste plantaren alde, baina galde dezagun”.
ITXASO: “Nik nahi nukeena da maiatzaren 24an galdeketa izatea, eta horrek izan beharko luke zabortegia egin edo errauste planta egin erabakitzeko galdeketa”.
OLANO: “Benetan hau da gai garrantzitsua. Pairatzen dugun krisi ekonomikoan, gizarte politikak dira jendearen beharrei irtenbidea emateko tresna eraginkorrena. Ahalegin handia egin dugu guk lau urteotan. Hasteko, inguru guztian murrizketak egin dira, eta Gipuzkoan ez da murrizketarik egin. Alderantziz. Gaur egun, aurrekontuaren %52tik gora gizarte politikarako erabiltzen da. Hori da inbertsioa, pertsonetan inbertitu behar dugu”.
ITXASO: “Zerbitzu sozialen gaian alderdi sozialistak begi onez ikusi ditu egindako politikak; batez ere, iraganetik zetozen politikak jarraitu direlako”.
“Gipuzkoak badu hirugarren sektore sendo bat, eta aldarrikatu behar da gizarte zibilak Gipuzkoan daukan indarra ere. Nik beste inon ez dut aurkitu Gipuzkoak daukan indar hori gaizkien pasatzen ari direnen alde lan egiteko… Behin hori esanda, nik Bilduren diskurtsoan faltan sumatzen dudana da epe luzerako gogoeta. Daukagun mehatxua da zahartze prozesu izugarri bat, eta egia da egun %52 zerbitzu sozialetara bideratzen dela, baina, etorkizunera begira, biztanleriaren piramideari erreparatuta, horrek gora egingo du. Gai izango gara horri eusteko? Egin behar dugu politika estrategiko bat, zahartze prozesu horrek etorkizunean ito ez gaitzan”.
ATXUKARRO: “Hor, noski, diru sarreren problema daukagu, eta diru sarrerak bermatzeko lana behar da, eta lanpostuak enpresen baitan daude”.
ARRIETA: “Argi dago politika publikoetan lehentasuna zerbitzu sozialek dutela. Bestalde, instituzioez gain, hor daude mugimendu sozialak ere, lan handia egiten. Mugimendu sozialek ondoan sentitu behar gaituzte, eta haien diagnostikoak kontuan izan behar ditugu, eurak baitaude gertuen behar gehien duen jendearengandik”.
OLANO: “Gipuzkoan eskaintzen diren gizarte zerbitzuak kalitatezkoak dira, eta ez administrazioari esker soilik. Administrazioak bere lana egiten du, baina ados nago hor sare sozial handi bat dagoela, irabazi asmorik gabeko elkarte mordo bat. Bi horiek izango dira etorkizuneko zutabe, gizartearen zahartze prozesuari aurre egiteko. Administrazioak baliabide gehiago lortu beharko ditu, besteak beste aberastasun eta fortuna handien zergaren bidez”.
ATXUKARRO: “Funtsezkoa da diru sarrerak edukitzea, baina moduan ez gaude ados, Xabier. Diru gehien duenari edo enpresariei gehiago kenduz, gehiago jasoko bagenu… Baina hori ez da hala. Hain zuzen, 400ek edo gehiagok alde egin dute Gipuzkoatik”.
OLANO: “Gehiago etorri dira joan direnak baino”.
OLANO: “Aurreko legealdietan dirutza gastatu da azpiegituretan. Bidegi sozietate publikoak 900 milioi euroko zorra du; eta horietatik 400 milioi hitzartu ziren justu hauteskundeak eta berehala, gobernu berria sartu baino lehen.
“Horrek hipotekatu du etorkizuna. Beraz, nahiz eta EH Bilduko kideok ez garen bidesariaren aldeko, zerbait egin beharko da azpiegituren finantzaketa bermatzeko. Bidesaria jarri? Izan liteke edozein sistema, baina zerbait adostu behar da, hori bada adostekoa. Zorra ordaindu ezean, bi-hiru urte barru zenbaki gorrietan gaude”.
ITXASO: “Arazoa da lau urtean behin sartzen denak hutsetik hasi nahi duela”.
OLANO: “Zorionekoak ginateke hutsetik hasi bagina. Gu minus 900 milioitik hasi ginen”.
ITXASO: “Gobernu batera iristean, ontzat jo eta behintzat onartu egin behar duzu aurretik egindakoa. Nik salatzen dudana da zenbateraino den zilegi aurrekoek eginiko gauzak atzera botatzea. Itun handi bat eskatuko nuke, jakiteko zeintzuk diren etorkizunean azpiegitura inportanteenak.
“Azken urteetan errepidez josi dugu Gipuzkoa, eta nik ez nuke errepide gehiago egingo. Garraio publikoaren eta batez ere trenaren legealdia izan behar du datorrenak. Eta horrek eskatzen du Gipuzkoako Foru Aldundiak sartu behar duela Topoan, geltoki gehiago eduki ditzan, frekuentzia hobeak eduki ditzan, unibertsitateraino irits dadin, Renferen sarearekin bat egin dezan… Horrek ahalbidetuko du gipuzkoarren %80k trena erabiltzeko aukera izan dezaten”.
ATXUKARRO: “Zorra ordaintzeko, guk uste dugu bidesaria beharrezkoa izango dela, baina betiere kontuan hartuta gipuzkoarrok era bateko bidesaria izan beharko genukeela, eta kanpokoek beste bat. Izan ere, gipuzkoarrok ordaindu dugu jada zergekin.
“Bestalde, garrantzitsua da abiadura handiko trena erabat bukatzea. Izan ere, Frantziara joateko hemen etena egiten da”.
ARRIETA: “Euskadi oso txikia da, baina lurralde bakoitzean dena eduki nahi dugu. Bizkaiak aireportua du, guk ere bai; Bizkaiak portua du, guk ere bai… Eta herri edo nazio ikuspegitik horrelako gauzak planteatu egin behar dira, eta ikusi non gauza bat eta non bestea. Abiadura handiko trenaren kontuan, gu kontra gaude, baina arazoa da ia-ia egina dagoela. Orain kontua da horrekin zer egin. Baina argi dago hori ez zela lehentasuna”.
OLANO: “Baina, Pello, abiadura handiko trena, zertarako? Inolako loturarik ez duena, herritarrei inolako zerbitzurik ematen ez diena, 5-10 minutu irabaztea baino ekarriko ez duena, eta halako dirutza gastatu behar da? Ez. Hori ez da lehentasuna; ez zen lehentasuna, eta ez litzateke egin behar”.
ATXUKARRO: “Abiadura handiko trenarena esparru zabalago batean kokatzen dut, Espainia mailan, eta Frantziarekin lotuta. Ez hainbeste Gipuzkoa edo Euskadi mailan, haratago baizik”.
OLANO: “Eta loturarik gabe?”.
ATXUKARRO: “Ez, loturekin, noski. Luzera begira, garrantzia izango du, eta behar-beharrezkoa izango da”.
ITXASO: “Bidesarien gaian, nik nahiago dut errepideak erabiltzen dituztenek ordaintzea, eta ez, aurrekontuetatik, erabiltzen dutenek eta ez dutenek ordaintzea. Hori justuagoa da. Eta, horri lotuta, zuek onartu duzue 25 euroko tarifa plano bat… Zergatik ez dugu egiten tarifa hori garraiobide publiko guzti-guztien erabilera mugagabea sustatzeko?”.
OLANO: “Hitz egin dezakegu horri buruz”.
ITXASO: “Ba, asko pozten naiz”.
OLANO: “Maiatzaren 24an, gerta liteke, eta hala espero dut, indar ezkertiar eta aurrerakoiek 26 batzarkideko langa gainditzea, eta gobernatu ahal izatea; edo gerta liteke EH Bildu kentzea lehentasun gisa jarri duen hiruko toxikoak, PSEk, PPk eta EAJk, 26ko langa hori gainditzea. Bestalde, erabakigarria izango da Ahal Dugu. Aldaketaren aldeko jarrera hartzen badu, ezin du onartu hiruko toxikoak gobernua har dezan. Gipuzkoan martxan dagoen aldaketa babestu beharko luke, bestela Gipuzkoan atzerapausoa eman dadin baimenduko baitu. Uste dut giltzarria izango dela erabakia Gipuzkoan edo Espainian hartzen duten. Gipuzkoan hartzen badute, espero dut erabakia aurrerakoia izatea”.
ITXASO: “Nik ez nuke inoiz horrelako terminorik erabiliko; baina, tira, bakoitzak jakingo du. Bestalde, nik esan dut eztabaida honetan zein iritzi dudan zuen politika inposatzaileaz, zuen ereduaz, gipuzkoarrontzat duzuen ereduaz. Eta ni ez nator bat eredu horrekin. Beraz, nik alternatibaren buru izan nahi dut; eta, ahalegin horretan, nik behintzat alderdi sozialistaren botoak aldaketaren alde jarriko ditut. Argi eta garbi esaten dut. Uste dut hori zintzo jokatzea dela”.
ATXUKARRO: “Argi dago ezker abertzalearekin, Bildurekin zer diferentzia ditugun. Beraz, lehen saiatu ginen bezalaxe, orain ere saiatuko gara Bildu buru izan ez dadin diputazioan”.
ARRIETA: “Gure asmoa, printzipioz, politika egiteko modua aldatzea da. Zer egingo dugun gure batzarrak erabakiko du. Printzipioz, ideia ez da batekin edo bestearekin hitzartzea, baldin eta ez badugu guk irabazten. Hori bai, alderdi batek egitasmo bat baldin badauka, herritarrentzat ona, hori bozkatuko dugu, aurkezten duen alderdia edozein dela ere.
Euskararen ezagutzaren eta erabileraren arteko aldeaz kezkatuta hitz egin dute EH Bildu eta Ahal Dugu-ko hautagaiek; PSE-EEkoak euskara erakargarriago egiteko beharra nabarmendu du; PPkoarentzat hori norberaren erabakia da.
Hizkuntza politika. Horixe Gipuzkoako foru hauteskundeetako hautagaiei aurkeztutako gaia. Denak ados daude euskara sustatzearekin, erabilera bultzatzearekin… “Gipuzkoa euskararen lurraldea da”, dio Denis Itxasok (PSE-EE). “Nik uste dut denok aitortzen dugula euskararen balioa”, Pello Atxukarrok (PP). “Gipuzkoan euskararen ezagutza nahiko txukuna da”, Xabier Olanok (EH Bildu). “Ezagutza asko handitu da, eta gaur egun euskaldun kopurua handia da”, Josetxo Arrietak (Podemos Ahal Dugu).
Hortik aurrera, eztabaida sakontzerakoan sortzen dira tirabirak. Euskaraz bizi nahi eta ezina adierazi dute Olanok eta Arrietak. Euskaraz bizi nahi duenak aukera baduela uste dute, berriz, Itxasok eta Atxukarrok.
Olanok nabarmendu du gipuzkoarren erdiek baino gehiagok ezagutzen dutela euskara, abiapuntua “nahiko txukuna” dela. Erabilera datuek kezkatzen dute. “Erabilera, proportzioan, oso baxua da; besteak beste, ez dakiten horiek behartzen gaituztelako, zenbait kasutan, beste hizkuntza bat erabiltzera”. EH Bildukoak ezinbesteko ikusten du ezagutza areagotzea. “Euskara ikasi nahi duen guztiari doan ikasteko aukera eskainiko diogu, ez baita zentzuzkoa lurralde batean ofiziala den hizkuntza bat ikasteko ordaindu behar izatea”.
Erabilerari dagokionez, euskaraz jardun ezin den lekuetan eragitea da xedea. Hala, diputazioak eta diputazioaren inguruko administrazio organo guztiek euskaraz funtzionatu eta herritarrari arreta nahi duen hizkuntza ofizialean emateko gaitasuna izan behar dutela dio Olanok. “Hizkuntza eskubideak herritarrarenak dira, eta administrazioak gai izan behar du bataren edo bestearen erabilera bermatzeko”.
“Nik euskaraz bizi nahi dut, eta Gipuzkoan ezagutza oso handia izango da, baina ni ezin naiz euskaraz bizi”. Argi hitz egin du Arrietak. Ahal Dugu-ko kidea Irungoa da. Agian herri txikietan egoera hobea izango dela uste du, “baina hiri handietan, Donostian, Irunen eta abar, argi dago ezagutza eta erabilera ez daudela maila berean”. Arrietak ere beharrezko ikusten ditu euskararen erabilera sustatzeko politikak.
Olanok zein Arrietak, biek ala biek nabarmendu dituzte euskaraz bizitzeko mugak. “Nik ere bizi nahi dut euskaraz, eta ahalegina egiten dut egunero, baina zailtasunak ditut, eta askotan ez dira nire borondatearenak, baizik eta inguruak jartzen dizkidanak”, erantzun dio Olanok Arrietari. Euskararentzat beste egoera bat amesten du Arrietak: “Guk bi hizkuntza dakizkigu, euskara eta gaztelera, eta erabiliko dugu nahi duguna; baina aukera hori izan behar dugu edozein tokitan. Sartu eta erabili nahi duzun hizkuntza”.
Euskara “gure altxorra” dela dio Itxasok, “elkarbizitzarako eta kohesiorako egundoko tresna” dela, baina arrisku bat ere ikusten du. “1960ko hamarkadan Koldo Mitxelenak esan zuen euskara ahulegia zela arma bezala erabiltzeko, eta, tamalez, herri honetan maiz gertatu izan den gauza bat da. Ez dezagun euskara konfrontaziorako tresna gisa erabil”.
Bestalde, euskararen inguruko jarrera ezkorrek ez dutela laguntzen nabarmendu du Itxasok. “Ez dira onartzen eman diren aurrerapauso guztiak, beti gaude halako biktimismo puntu batekin, beti gaude nahikoa ez balitz bezala… eta nahikoa ez da, baina balioa eman behar zaie emandako pauso guztiei. Zorionez, euskarak gero eta presentzia handiagoa daukalako”.
Ezagutzari eta erabilerari buruzko eztabaida horretan, Itxasok uste du “batez ere etxean” gertatzen dela jauzi hori. “Inkesta soziolinguistiko guztiek diote etxean, esparru pribatuan, libre sentitzen garenean txikitzen dela euskararen erabilera; eta behartuta gaudenean, esparru publikoan, enpresan areagotzen dela erabilera”. Euskararen aldeko politiketan ikusten du hutsa, euskara “erakargarri” egin behar dela dio PSE-EEko hautagaiak.
Olanok ez du Itxasok esandakoa konpartitzen: “Zoritxarrez euskara erabiltzeko zailtasunak etxean ere badaude, baina etxean baino gehiago daude kalean, gizartean, administrazioetan, enpresetan…”.
Kezkarik ez
Euskararen inguruan ez dagoela kezkatuta dio Atxukarrok. PPkoaren esanetan, garai batean euskarak izandako arazoak jada desagertu dira: “Eta denok aitortzen dugun balioa da”. Euskara erabiltzea, baina, bakoitzaren erabaki gisa ikusten du.
ATXUKARRO: “Euskara ikasi eta erabili nahi duenari bidea eta erraztasunak eman behar zaizkio eta ematen zaizkio. Baina erabiltzea norberaren erabakiaren baitan dago, eta ni ez naiz nor sentitzen inor behartzeko”.
OLANO: “Ezin dut onartu zure ahotik, Pello, inondik inora ere, entzutea erraztasunak eman behar direla euskara erabiltzeko, eta gero zure taldeko Urkijo jaunak behin eta berriz udal guztiei errekurtsoak, debekuak jartzea eta auzitara jotzea. Hori hipokrisia hutsa da”.
ATXUKARRO: “Baina nik uste dut ez dela euskararen kontra egin duelako, baizik eta herri horri ez zegokiolako diru hori erabiltzen zuen moduan erabiltzea”.
OLANO: “Baina nola irudituko zaizkizu ondo Urkijok euskararen kontra egiten dituen urrats guztiak? Hori euskaldun bati ezin dakioke ondo iruditu”.
Leave a Reply