Adegi patronalak Hitzarmena jarri du martxan, enpresen barruko hitzarmen kolektiboetako negoziazioetan laguntzeko zerbitzua. Espainiako Gobernuak onartu berri duen lan erreformak lurraldeko hitzarmenen gainetik jartzen ditu enpresako itunak, eta, horren ondorioz, geroz eta enpresa gehiagok itun propioa egingo dutela uste du Adegik. Negoziazio horietan enpresari aldarrikapen plataforma osatzen lagunduko dio patronalak, “modu eraginkor eta pertsonalean”, eta haren ordezkari gisa jardungo du negoziazio mahaietan. Patronaletik adierazi dutenez, horrek “koherentzia eta oreka” emango dio Gipuzkoako negoziazio sistema orokorrari, “ildo estrategikoak” ezarriz.