Bideoaldiaren 36. edizioa antolatu du Donostiako Intxaurrondo auzoko kultur etxeak. Ikus-entzunezkoak lantzeko ikastaroak antolatzen dituzte urte osoan, eta talde irekientzako laborategi bat ere badaukate.

Emakumeak Automobilismoan elkarteko kideek sortu dute andreen kluba, hilaren 29ko proba antolatzeko. Elgoibar eta Etxebarri artean jokatuko dute lasterketa, eta emakumeek antolatutako aurrenekoa izango da.

Kultur arloan egin du lan beti Nere Erkiagak, baina Tanatologia ikasketak ere egin zituen. Hil Arte Bizi egitasmoa sortu zuen, jendea heriotzari begira prestatzeko, era praktikoan.

Ordiziako Orkli kooperatibak Orklidea ekinbidea martxan jarri du egitasmo sozialak garatzeko diru laguntzak emateko, hango kide Gurrutxagak esan duenez.

Donostiako Antigua auzoko Aratz erretegiak 35 urte bete ditu, eta urteurrena ospatzeko ekitaldia egin zuten asteartean. Mikel Laboa omendu zuten ekitaldian, eta hainbat euskal kulturgile gonbidatu zituzten.