Andoaingo Leizaran eskubaloi taldeak dokumental bat eta mahai inguru bat eskainiko ditu gaur, 'Zuengatik gara' izenburupean. Jokalari ohien eta egungoen arteko harreman sarea indartzea du helburu egitasmoak.

Oarsoaldea Garapen Agentziak antolatuta, enpresei begirako Enpatikonomia jardunaldiak egingo dituzte gaur, Oiartzunen. Talentuaren eta lanaren zentzua landuko dutela azaldu dute antolatzaileek.

Zumarraga-Urretxuko ZU Bertsotan eskolak Martxoan Bertsoa jaialdiaren 22. aldia abiatu du. Dagoeneko jokatu dira hiru saio, eta martxoaren 23an izango da finala.

Euskal Herrian Euskaraz taldeak Donostian taldea sortu du. Eragileak barnera begirako prozesu bat egin du, eta aurrera begirako helburu berriekin hasi dira lanean.

Mapandreak proiektuak Donostian emakumea presente dagoen espazio publikoak markatzen dituen mapa ilustratu bat argitartu du, eta horren gaineko erakusketa bat zabalduko dute bihar, Bidebietako Kontadoresen.

Iazko kale neurketen arabera, Ibarran %52,3k erabiltzen dute euskara, %43,4k gaztelera, eta %4,3k beste hizkuntza bat. Azken hogei urteetan lau puntu egin du behera euskararen erabilerak. Gazteak dira euskara gehien erabiltzen dutenak.