Gaur hasiko da Urretxuko 35. Mineralogia eta Paleontologia Astea. Igandera bitartean, Euskal Herriko nahiz atzerriko 30 erakusketari elkartuko dira Ederrena pilotalekuan.
Joanes Antxieta musikari eta konpositorea hil zela bostehun urte bete dira aurten, eta hura ezagutarazteko ekintza sorta bat antolatu dute Azpeitian. Gaur, hitzaldia eta mahai ingurua izango dira.
Hirugarrenez egingo dute Gazteartean Fest musika jaialdia, bihar, Irungo Zabaltza plazan. Klase magistral bat eta kontzertuak izango dira egun guztian.
Ormaiztegiko Zumalakarregi museoan XIX. mendeko jantzigintzaren inguruko ikastaro bat egiten ari dira urrian. Hamar bat laguneko taldea elkartu ohi da, larunbatero. Azaroan erakutsiko dituzte sortutako jantziak, Eleganteen Bilkuran.
III. Pello Errota sariketaren finala jokatuko dute gaur gauean, Asteasun. Unai Mendizabal, Iñaki Gurrutxaga, Jexux Mari Irazu eta Eñaut Martikorena ariko dira bertsotan.
Beste zinekluben aldean desberdina izango da Hernanikoa, ez duelako mugatu nahi publiko zehatz batera. Filmen erdia inguru euskarazko azpidatziekin ematea da asmoa.
Hurrengo astean egingo dute Donostiako Iturritik dantza jaialdia, urriaren 19tik 22ra, eta Kukai dantza konpainiak 'Oskara' eta 'Giza' lanak eskainiko ditu han. Jaialdi "gozagarria" izango dela adierazi du Jon Maia Seinek.
Kuartela Herrira jaialdia egingo dute datozen hiru larunbatetan Aretxabaletan. Hamabi kontzertu izango dira herriko hainbat txokotan. Kuartelaren egoera txarra dela salatu dute erabiltzaileek, eta neurriak hartuko dituela agindu du udalak.
Gipuzkoako zinema eta antzerki aretoetan apala da euskararen presentzia. Gaia landu duten eragileek salatu dute laguntza instituzionala falta dela arlootan euskara bultzatzeko. Zineman eta antzerkian aritzen diren aktoreek, berriz, euskaraz lan egiteko oztopoak nabarmendu dituzte.
Tolosaldean martxan da euskarazko komikigintza eta sormena sustatzea helburu duen XVI. Galtzakomik lehiaketa. Azaroaren 28ra arte aurkeztu ahalko dira lanak.
