Autobusen ordutegiak luzatzea, ospitaleetako zerbitzuak areagotzea, herrietako jaietako zerbitzuak indartzea, gauetako hainbat zerbitzu hobetzea eta garraio bideak koordinatzea. Herritarren iritziak kontuan hartuta, horiek dira Gipuzkoako Foru Aldundiak autobus zerbitzuan egingo dituen aldaketa orokorrak. Urtebeteko parte hartze prozesuaren ondoren, eskualde gehienetan 2015. urte hasieran jarriko dute martxan zerbitzu berria. Aldundiak lehen baino %36 diru gehiago erabiliko du autobus zerbitzuan, eta 57 lanpostu sortuko ditu.

Larraitz Ugarte Mugikortasuneko eta Bide Azpiegituretako diputatuak eta Unai Erroitzenea Mugikortasuneko eta Garraioetako zuzendariak lehengo astean eman zituzten zerbitzu berriaren inguruko azalpenak. Datozen asteetarako, berriz, hainbat bilera informatibo antolatu ditu aldundiak, eskualdez eskualde. Hiru bilera eginak dituzte aste honetan —Beasainen, Arrasaten eta Eibarren—, eta beste bost egingo dituzte azaro aurretik: Zumarragan, Hernanin, Azpeitian, Tolosan eta Zarautzen. Herritarrei parte hartzeko deia egin diete.

Autobus zerbitzua hobetzeko prozesua iazko urrian jarri zuen martxan diputazioak, eta lau fase nagusi izan ditu. Herritarren beharretara egokitutako zerbitzua eskaintzeko ezinbesteko jo zuen haien ekarpenak kontuan hartzea. Hori horrela, herritarren iritziak bildu zituen lehen fasean, urritik azarora bitartean.

Herritarrekin, eragileekin eta udalekin datuak kontrastatu zituen, egoeraren diagnostikoa osatu, eta haien proposamenak jaso. Diputazioaren datuen arabera, 4.000 herritarrek baino gehiagok parte hartu dute, eta 56 herritan egin dute gaiari buruzko parte hartze prozesua. "Sektore bereziengana" iristeko ahalegina egin du aldundiak, eta herritar guztientzako komunikazio kanpainak egin ditu.

Iazko abendua eta aurtengo otsaila bitartean aurreproiektua idatzi zuten teknikariek, herritarrek egindako ekarpenekin. Hirugarren fasea, berriz, martxoan eta apirilean egin zuten. Bertan, aurreproiektua erakutsi zieten herritarrei; hainbat bileratan azaldu zieten zein ekarpen onartu zituzten eta zein ez. Herritarren ekarpen gehiago ere jaso zituzten.

Orain, azken fasean sartuta daude buru-belarri. Behin betiko proiektua onartu dute, eta lehiaketa publiko bidez adjudikatuko dute zerbitzua. Prozesuaren azken faseko zereginen artean dute herritarrei zerbitzuaren berri ematea ere. Urrats horiek eginda, 2015. urte hasieran jarriko dute martxan zerbitzu berria.

Ekarpenen %75 onartuta

Herritarrek askotariko eskaerak egin dituzte autobus zerbitzuaren inguruan. Hauek, batez ere: zerbitzuaren gaineko informazioa hobetzea, autobusen arteko koordinazioa hobetzea, gauetako autobus zerbitzua hobetzea, ospitaletarako lotura indartzea —Donostia, Mendaro eta Zumarraga—, hezkuntza zentroetarako loturak areagotzea, geltokiak berritzea eta Euskal Herri osoan txartel bakarra jartzea. Diputazioak ezin izan die kasu egin eskaera guztiei, baina horiek oinarri hartuta osatu du zerbitzu berria. Herritarren ekarpenen %75 onartu ditu.

Hala, ordutegiak luzatuko dituzte. Zerbitzu nagusiak 06:00-06:30ean hasiko dira, eta 22:00-22:30ean bukatu. Horrez gain, asteburu iluntzeetan zerbitzua luzatuko dute, eta gauetakoa hobetu. Ospitaleetako zerbitzuak areagotzea ere jarri dute lehentasunen artean. Helburua da gaua pasatzera joan behar duenak autobusez joan ahal izatea. Bestalde, herrietako jai egutegi berezia egingo dute, egun horietan zerbitzua indartzeko.

Autobus arteko aldaketak koordinatzeko saioak egin ditu aldundiak. Gainera, Euskotreneko, Renfeko nahiz Bizkaibuseko zerbitzuekin loturak ziurtatzen ahalegindu dira. Zerbitzu berriak aldaketa ugari eragingo ditu autobusen ibilian. Lehena, kilometro kopuruan. Urtean 21 milioi kilometro egitea aurreikusi dute, lehen baino bost milioi gehiago.

Galtzaundi Euskara Elkarteak, Ibarrako Udalaren laguntzarekin, VII. Galtzakomik komiki lehiaketa antolatu du. Helburua euskarazko komikigintza sustatzea duenez, sortzaileek euskara hutsean aurkeztu beharko dituzte lanak. Komikigileek erabilitako euska...

Mikelazulo eta Txintxarri elkarteek, Amalatz talde feministarekin batera, Elkartasun kilimak izeneko zikloa antolatu dute Errenterian. Zikloaren barruan, hitzaldi bat prestatu dute gaurko, 19:00etan, Mikelazulon. Han parte hartuko dute Leonor Castaño Kolonbiako emakume nekazari beltz eta indigenen elkartekoak eta Consuelo Vidal Valentziako Atelier elkarteko kideak. Kolonbiako emakumeen egoeraren inguruan hitz egingo dute.

Hitzaldiaz gain, elkartasun azoka ere antolatu dute Txintxarri elkartean. Bihar 11:00etatik 20:00etara egongo dira, eta igandean, 11:00etatik 15:00etara. Azokan jartzeko materiala herritarrek eraman dute.

'Elkartasun kilimak'

Gaur, 19:00etan, Errenteriako Mikelazulon.

Mindara elkarteak beren kasa mugitzeko zailtasuna duten herritarrak integratzeko lan egiten du. Urte osoan hainbat jarduera antolatzen ditu aniztasun funtzionala duten pertsonei laguntzeko helburuarekin. Besteak beste, kirol jarduerak sustatzen ditu. Errenteria, Pasaia, Lezo eta Oiartzunen lan egiten du elkarteak.

Bihar, adibidez, pilota egokituko txapelketa jokatuko dute, elkartearen izen berekoa. Mindara elkarteak egoitza duen udalerrian egingo dute txapelketa. Errenterian, alegia, Fanderiako pilotalekuan. Txapelketa antolatzen duten hirugarren aldia da.

Jardunaldia 11:00etan hasiko da, eta 13:30ean lehen atsedenaldia egingo dute. Palan jokatuko dute, binaka. Arratsaldean, raspall-ean eta palan arituko dira, 16:30etik 19:30era. 34 pilotarik parte hartuko dute. Hamabostek urritasun intelektualen bat dute, eta zutik jokatuko dute pilotan. Gainontzeko hemeretziek gurpil aulkian jokatuko dute; hamahiru gipuzkoarrak izango dira, eta sei, valentziarrak.

Mikel Izagirre Anabitarte da Mindarako presidentea. Pilota txapelketa antolatzeari zer dela-eta ekin zioten azaldu du: "Gipuzkoako Kirol Egokituaren Federazioak ikusi zuen aniztasun funtzionala zein ezintasun fisiko edo psikikoa duten pertsonentzako pilota oso erakargarria zela kirol bezala, sozializaziorako zein lehiakortasunerako. Orduan, Usurbil inguruan talde bat sustatu zuten, orain dela sei urte. Zubietan hasi ziren entrenatzen". Geroztik, modalitatea zabaldu nahian dabiltza buru-belarri.

Orain dela bi urte sortu zuten Mindara elkartea, eta eurak ere pilota lantzea erabaki zuten, iaz. "Iazko udazkenean, pilota egokituko Gipuzkoako bigarren eskola sortu zen Errenterian", gogorarazi du Izagirrek. Hori bai, urtebete lehenago herri horretan bertan pilota txapelketa egin zuten, eta, Usurbilgo eskolakoez gain, ezintasun psikikoa duten hainbat lagun elkartu ziren: zarauztarrak, irundarrak, oriotarrak eta donostiarrak. Gurpildun aulkian jokatzen zuten batzuk ere izan ziren: raspall-a jokatzen duten valentziarrak (Herrialde Katalanak) eta trinketean aritzen direnak, Tarbesetik (Okzitania) —aurten ez dira Fanderiako pilotalekuan izango—.

Partida nagusia lehen aldiz

Biharko ekitaldiaren helburua da elkar ezagutzea, harremanak sortzea eta kirol egokitua bultzatzea. "Pilota egokitua publiko egin nahi genuen, baita gainontzekoekin elkartu ere, etorkizunerako proiektu komunik bageneukan ikusteko. Hirugarren urtea izango da, eta aurreko ekitaldietako izpiritu bera mantendu nahi dugu, bi osagai berri gehiagorekin".

Alde batetik, partida estelarra jokatuko dute, eta, bestetik, Errenteriako alkatea eta Eusko Jaurlaritzako kiroletako zuzendaria gonbidatu dituzte biharko saiora, baita Euskal Herriko eta Errioxako pilota zein kirol egokituko federazioetako presidenteak ere, besteak beste.

Partida nagusia 12:00etatik aurrera jokatuko dute. Bi bikoteak gurpil aulkian arituko dira; bikote bateko kideek ezintasun fisikoren bat dute, eta beste bikoteko kideek ez. "Oso ikusgarria izango da", ziurtatu du Izagirrek. "Horrekin erakutsi nahi dugu ezintasunak edukitzea ez dela abantaila, ezta desabantaila ere, ezberdina izatea esan nahi duela baizik". Ezintasun fisikorik ez duten pilotarietatik bat zesta puntan aritzen da, eta bestea, palan eta esku hutsez: "Biak aritzen dira gurekin, bata entrenatzaile moduan eta bestea jokatzen. Esaten dute nahiago dutela zutik baino gurpil aulkian jokatzea. Egia da ez dela hain ikusgarria, baina bi boterekin jokatzen da, eta pilota bigunagoarekin. Estetikoki oso polita da".

Biharko txapelketarekin pilota egokituko eskolak sustatu nahi dituztela berretsi du Izagirrek: "Horren hazia erein nahi dugu. Errenteriako eta Usurbilgo jendeak elkar ezagutzen dugu, eta biak bakarrik baldin bagaude, modalitate honek ez du etorkizunik izango. Euskal Herriko herri guztietan dago frontoi bat, eta ezintasunen bat duten pertsona asko dira kirol hau praktika dezaketenak. Kirola gurea da, ez dago beste inon, eta modu batean hedatu nahi dugu. Espero dugu jendeak ikuskizunarekin gozatzea, maila oso ona baitago jada bi eskolen artean".

Hainbat opari, zozketan

Txapelketa, elkar ezagutzeko topagunea ez ezik, jai bat izatea nahi dute antolatzaileek. Pilota partidez gain, ikusleei zozketetan parte hartzeko aukera emango diete. Erloju bat, ardoa eta beste hainbat opari zozkatuko dituzte.

Horrez gain, laguntzaileei eskerrak eman dizkie Izagirrek. Izan ere, goizeko partiden ondoren, Niessen elkartekoek bazkaria prestatuko diete. Urkabek, Uriñak eta Super Amarak jarriko dute jana, eta Errenteriako beste hainbat denda eta enpresak ere diruz lagunduko dute ekitaldia. Diru hori garaikurretarako erabiliko dutela jakinarazi dute. Udal Kirol Patronatuak eta Errenteriako Udalak ere lagundu dute.

Azkenik, nahi bat azaleratu du Izagirrek: "Lau herrialde hasiko bagina, gainontzekoak ere hasiko lirateke. Kirol hau erakuts dezatela; ikusten duena pozik geratzen da, bai ikusgarritasunarengatik, bai lehiakortasunarengatik eta bai pasioarengatik. Ikus dezatela badagoela jendea arazoak gainditu eta kirola egiten duena".

Sektorea indarberritzeko helburuarekin zabaldu dute Donostian Komikigunea. Gipuzkoako Foru Aldundiak irekitako espazio berrian istorio marraztuei lotutako milaka agiri aurki daitezke. Asko aldundiak Luis Gasca komikizaleari erositako funtsaren parte dira. Biltegi baten gisa funtzionatzeaz gain, Komikigunea leku dinamikoa izatea nahi du Garazi Lopez de Etxezarreta aldundiko kultura zuzendariak (Pasaia, 1977).

Luis Gascaren funtsean Euskal Herrian egindako lan gutxi aurki daitezke.

Aldundiak aukera bat izan zuelako erosi zion 2004an Gascari funtsa. Euskal komikigintzaren ikuspegitik agian ez da interesgarria, baina bai zinemarekin eta komikigintzarekin duen lotura aintzat hartuta. Oso funts pertsonala da, Gascaren zaletasunetatik abiatzen baita. Horri esker unibertsalak diren aleak eta erreferentziak daude. Baina uste dut lortu dugula horri buelta ematea, eta zentzu onenean diot. Izan ere, beste funts batzuk iritsi dira, dohaintza edo depositu gisa. Adibidez, Felipe Maia komikizale zumaiarraren funtsa edo Rotu Astrain marrazkilari euskaldunaren dohaintza. Azkenean, inertzia batzuen ondorioz aldundia lortzen joan den funtsek eman digute aukera euskal komikigintzarentzako gune estrategiko bat sortzeko. Gure lehentasuna izango dira euskarazko eta Euskal Herriko komiki eta komikigileak. Horrek gure erosketa politika aldatuko du.

Ateak zabalik daude dohaintza gehiagorentzat?

Bai, erabat zabalik. Pozik gelditu ginen aurkezpenean; komikilari asko etorri zen, Juan Manuel Diaz de Gereñu ikerlariak idatzi duen liburuaren aurkezpenera ere jende asko joan zen, eta, esan didatenez, aste honetan ere mugimendu handia izan da. Funtsak eskuratzen ari gara. Jende asko ari da ekartzen materiala, eta Komikigunea oraindik zabalik dago funtsak areagotzeko. Jendeak gauzak baditu etxean gordeak eta ekarri nahi baditu, gustura jasoko ditugu, digitalizatu eta berriz guztien eskura uzteko. Gauza bat da erosketa politika argia izatea, baina garrantzitsua da argitaratua dagoen hori eskuratzeko formulak bilatzea ere.

Eta aurrerantzean zein da asmoa?

Koldo Mitxelena liburutegian komikien kontsultarako eta mailegurako espazio bat izateak aurrera begira zerbitzu iraunkor bat emateko aukera ematen digu. Leku dinamiko bat sortu nahi dugu, programazio propio bat izango duena. Komikilariek espazio bat izango dute eztabaidatzeko, bilerak egiteko, liburuak aurkezteko...

Sorkuntza gune ere izango al da komikigunea?

Gaur-gaurkoz, Komikigunea ez dut ikusten sorkuntza prozesuak garatzeko leku bezala, baina bai esperientziak eta ezagutzak trukatzeko gune moduan.

Komikia, adierazpen gisa, behar bezala baloratuta al dago?

Diaz de Gereñuk aurkezpenean esan zuen Europako leku askotan komikilaria komikilaria dela. Hau da, komiki gidoilari batek komikientzako bakarrik egiten dituela gidoiak. Kanpoko leku askotan adierazpen propio bezala hartzen dute komikigintza. Zoritxarrez, hemen asko dago egiteko. Esan zen baita ere askoz merkeagoa dela beste hizkuntza batzuetako komikiak itzultzea, berriak sortzea baino. Horrek asko zailtzen du bertako sorkuntza propioa. Babestu beharko dugu hori, dudarik gabe, baina lortu behar duguna da jendea sentsibilizatzea eta irakurlegoa sustatzea.

Nola sustatu irakurketa helduen artean? Askok uste du komikiak haurrentzat direla.

Garrantzitsua da Koldo Mitxelenako liburutegian komikiari eskainitako gune bat izatea. Zeren liburutegi hori helduentzat da, eta poliki-poliki joango da jendea gerturatzen. Komikigunearen bitartez, erakusketak eginez, ezagutza sustatuko dugu. Adibidez, Paco Roca eta komikia lotzen baditugu, ari gara beste jende batengana hurbiltzen.

Marrazteko obsesioak eskola garaiko apunteak ere irudien bidez hartzera eraman zuen Dani Fano. Egun, komikigilea da; haren hitzetan, 12 urte zituela amak oparitu zizkion helduentzako bi komikiri esker. "Epic eta Vertigo aldizkarien lehen zenbakiak!". ...

Emakumeen autonomia indibiduala eta kolektiboa indartzea, emakumeen artean sareak sortu eta esperientziak partekatzea, eta historian emakumeek egin dituzten ekarpenak ezagutaraztea eta aitortzea. Horiek izan dira hasiera-hasieratik Pasaiako Jabekuntza Eskolak izan dituen helburuak.

Iaz sortu zuten Pasaian bertako emakumeen parte hartzea eta mobilizazioa sustatu nahi duen eskola. Bigarren ikasturtea hastera doaz aurki, eta lehengo astean aurkeztu zuten aurten prestatu dituzten ikastaroen eskaintza, Trintxerpeko alkateordetzan.

Udaleko Berdintasun Mahaiak sortu zuen proiektua iaz. Berdintasun Mahaian parte hartzen dute Pasaiako emakume taldeek —Harremantxo, Bekoz Beko, Lagun Artea eta Topaketa— eta haiekin batera, Pasaiako Udaleko Berdintasun Arloak.

Maider Andonaegi udaleko Berdintasun Arloko teknikaria da, eta bera aritzen da Jabekuntza Eskolaren inguruko guztia dinamizatzen. Adierazi duenez, prestakuntza da Jabekuntza Eskolan emakumeen parte hartzea eta mobilizazioa sustatzeko erabiltzen duten tresna, ikastaroen bitartez topagune bat sortzen dutelako adin, jatorri eta ideologia askotariko emakumeentzat.

Emakume asko bildu ziren Trintxerpen egindako aurkezpenean, eta, horregatik, besteak beste, "oso balorazio ona" egin du udaleko Berdintasun Arloak Jabekuntza Eskolak orain arte egindako bideaz. "Ikustea elkarte desberdinetako emakumeak, herrialde ezberdinetakoak, ideologia ezberdinetakoak... denak proiektu honek aurrera egiteko gogoarekin, guretzat oso gauza handia izan da".

Eskaintza oparoa

Ikastaroak orain hasiko dira —gutxi batzuk eginak dituzte— eta ekaina bitartean izango dira martxan. Guztiak doakoak dira, eta ikasturte osoan egongo da izena emateko aukera, ikastaroen hasiera eguna gerturatu ahala.

Aurten gai asko jorratuko dituzte, baina, Andonaegik azaldu duenez, bada arreta bereziarekin landu nahi izan duten gaia: "Oso kontuan eduki dugu indarkeria sexistaren inguruan hausnarketa bat egitea". Horretarako, hainbat ikastaro landu dituzte, emakume heldu nahiz gazteentzat, formatu desberdinetan, baina biak gai beraren bueltan. Autodefentsa, mikromatxismoa, bortizkeria sexista eta xenofoboa, sexualitatea... horiek eta beste askok dute tokia aurtengo eskaintzan.

Aurreko egunetan Libe, Skasti, Larregi eta Aguxtin Alkhatek jo ondoren, gaur, 19:00etan, Kasernarat taldeak —argazkian— emango du kontzertua Donostiako Elkar estudioan. Elkar Estudioa Sesioak lehiaketara aurkeztutako maketa eta proposamenen artean bost lan aukeratu zituzten, eta, aste honetan, horien zuzeneko sesioak grabatzen ari dira. Hamaika telebistarekin elkarlanean egindako proiektua da. Elkar estudioa agertoki bilakatzen dute, eta 50 ikus-entzulerentzako tokia dago egun bakoitzeko. Sarrera aurrez hartu behar da, proiektuaren webgunean.

Gipuzkoarren %95,5en arabera, herritar orok eremu pribatuan norbere kultura mantentzeko eskubidea izan behar du; %70,4k uste dute, gainera, erakundeek bultzatu egin behar lituzketela Euskal Herrian bizi diren kolektibo guztien kulturak. Babes horretan gehiago zehaztu ahala, jaitsi egiten da aldeko jarrera: gipuzkoarren %58,7k diote hezkuntza sistemak bermatu beharko lukeela Euskal Herrian bizi diren kolektibo guztietako hizkuntza eta kulturen presentzia.

Horiek dira Aztiker soziologia enpresak egindako ikerketaren datu batzuk. Aste honetan argitaratu dituzte Gipuzkoako Foru Aldundiak eskatuta iaz egindako inkestaren emaitzak. Guztira, 2.500 elkarrizketa egin zituzten, etxez etxe. Euskal Herri osoan egin zituzten galdeketak; horietatik 403, Gipuzkoan. Oro har, kultur aniztasunarekiko jarrera ona agertu dute elkarrizketatuek.

Besteak beste, ikerketan aztertu dute hainbat jatorritako herritarrekiko "sinpatia maila" zenbaterainokoa den. Ikerketaren arabera, gipuzkoarrek ikuspegi positiboa dute Espainian, Frantzian edo Europako Batasunean jaiotako bizilagunei buruz. Baita Latinoamerikan jaiotakoez ere. Kontrakoa gertatzen da, ordea, Europa ekialdekoen, asiarren, errumaniarren eta marokoarren kasuan. Ikuspegi negatiboa gailentzen da horien inguruan. Bereziki aipagarria da marokoarren kasua. Ipar Euskal Herrian haiekiko sinpatia indizea positiboa da. Hego Euskal Herrian —Gipuzkoan ere bai—, aldiz, indize baxuena dute.

Ondorio hau atera dute hortik: jatorri ezberdinen arteko harremana zenbat eta estuagoa edo zaharragoa izan, orduan eta handiagoa da elkarren arteko konfiantza. Hori gertatzen da marokoarren kasuan. Ipar Euskal Herrian aspaldikoa da haien presentzia, eta gehiago ezagutzen dituzte. Hego Euskal Herrian, berriz, konfiantzarik eza handia da oraindik. Extremadurarren kasuaren bidez azaldu du Asier Etxenike Aztikerreko kideak: "Duela berrogei urte extremadurarrei buruzko galdeketa bat egin balitz, ziur aski negatiboa izango zen haiekiko ikuspegia. Oraindik ezezagunak ziren Euskal Herrian".

Herritarren arteko konfiantzan hizkuntzak ere eragina duela uste dute. Kolonbiarrak, adibidez, ez ziren marokoarrak baino lehenago etorri Euskal Herrira. Hala ere, inkestaren arabera, haiekiko ikuspegi hobea dugu. Beste arrazoi batzuen artean, uste dute hizkuntza ulertzeak laguntzen duela bi kulturaren arteko harremana sendotzen.

Bestalde, galdeketaren emaitzei erreparatuta, ondorioztatu dute etorkinekiko abegikortasun handiena dutenek ezaugarri hauek dituztela: ezkertiarrak, independentistak eta ikasketa maila altukoak izatea.

Elkarrizketatuei galdetu zieten kulturaren eta hizkuntzaren arloan migratzaileei eskatu beharko litzaiekeenari buruz ere. Gipuzkoan itaundutakoen artean, %79,9k begi onez ikusiko lukete etorkinek Euskal Herriko kultura eta ohiturak bereganatzea. %6,8 horren kontra leudeke. %13,3k, berriz, tarteko aukera hautatu dute: ez daude ez ados eta ez kontra.

Elkarrizketatuen artean, %77, 2 daude etorkinei gaztelera ezagutzeko eskatzearen alde; %8,7 kontra. Euskara ezagutzea eskatzearen alde, berriz, %71, 2 daude; eta kontra %9,3. Bestalde, euskararekiko jarrera ona erakutsi dute inkestan: %51k badakite, %5,8 ikasten ari dira, %15,6 ikasten aritu izan dira, %10,6 ez dira aritu euskara ikasten, baina gustatuko litzaieke. Beste aldean kokatzen dira %17,1: euskaraz ez dakite, eta ez daukate ikasteko asmorik.

ldentitateari buruz galdetuta, %89,5ek diote euskal herritarrak sentitzen direla. Espainiartzat, berriz, %46,7k dute beren burua. %10,2 beste nazio edo estatu batekoa ere sentitzen dira (errumaniarra, dominikarra, ekuadortarra, marokoarra...).

Euskal Herria zer lurraldek osatzen duten galdetuta, gipuzkoar gehienek (%56k) erantzun dute zazpi probintziak osatzen dutela. %32,8k diote EAE dela Euskal Herria. %10,9ren ustez, berriz, EAEk eta Nafarroak osatzen dute. Galdetutakoen ia erdiek (%49,4k) Euskal Herriko pasaportea nahiko lukete, %21,4k Espainiakoa, eta %11,7k bi pasaporteak.

Aztikerrek iaz egindako ikerketaren arabera, gipuzkoar gehienek, edonon jaioak izan arren, gustuko dute Euskal Herrian bizitzea. Izan ere, %92,7k erantzun dute hamar urte barru ere bertan bizi nahi luketela.

Bi hilabeteko etenaldiaren ondoren, Elgetako Espaloia kafe antzokiak joan den larunbatean ekin zion kultur denboraldi berriari. 2004tik, ireki zutenetik, Goibeko euskara elkarteak izan du Espaloia kudeatzeko ardura, baina hemendik aurrera Oihulari Klo...