Bizitza erabat aldatzen denean

Crohn-en gaixotasuna eta kolitis ultzeraduna duten herritarrek aurre egin behar izaten diete egoera deseroso batzuei. Gipuzkoako Accu elkarteak egoitza bat irekiko du laster, Irunen.

Erik Salazar

Bidasoan, Crohn-en gaixotasuna eta kolitis ultzeraduna duten herritarrek erreferentzia gune berri bat izango dute laster, etxetik oso gertu. Izan ere, Gipuzkoako Accu elkarteak, Crohn-en gaixotasuna eta kolitis ultzeraduna duten herritarren elkarteen konfederazioak, gaixo horiei laguntzeko egoitza bat irekiko du Irunen. Idoia Quiles da elkarte horretako presidente izendatu berria, eta Irungo egoitza berria aurrerapausoa da, haren ustez: “Beharrezkoa da Gipuzkoa osoan laguntza ematen jarraitzea, eta Bidasoko gaixoentzat albiste ona da Irunen egoitza bat irekitzea”.

Crohn-en gaixotasunak eta kolitis ultzeradunak hainbat sintoma eragiten dituzte gorputzean; urdailean gertatzen da horietako bat. Horregatik, jende askorentzat, mingarria izateaz aparte, deserosoa bihurtzen da gaixotasuna, Quilesen aburuz: “Nola esan jendeari behin baino gehiagotan komunera joan behar dudala, baina nahiago dudala bakarrik joatea? Egoera ez da batere atsegina”.

Dena den, gaixotasunen artean ezberdintasunak daudela zehaztu du Gipuzkoako Accu elkarteko buruak. Haren esanetan, alde batetik kolitis ultzeraduna dago, heste loditik ondesteraino doan zatiko gaixotasuna; eta, bestetik, Crohn-en gaixotasuna, ahotik digestio aparaturainokoa. Bi kasuetan odola galtzen du gaixoak, eta ultzerak sortzen dira. Komunera joateko behar nabaria izaten da sintoma nabarmenena; askotan, berehalakoa.

Ia 30 urteko ibilbidea

Gipuzkoako Accu 1994an sortu zuten; beraz, ia 30 urteko eskarmentua du jada. Quilesek berak gaixotasun hori du; 1996. urtean diagnostikatu zioten. Haren aburuz, gaixoentzat ezinbestekoa da jakitea zer gertatzen ari zaien: “10 urtetik 35era bitarteko adin tartean daudenei egiten dizkiete diagnostikoak. Ume batentzat nabarmena da aldaketa; nerabe batentzat, berriz, zaila da egoera. Gaixotasunak bizitza aldatzen dizu”.

Gaixoei laguntza ematea da elkartearen helburu nagusia; bere esperientzia abiapuntutzat hartuta, elkarteak egiten duen lanaren garrantzia defendatu du Quilesek: “Bere garaian asko lagundu zidaten niri. Gaixoentzat oso garrantzitsua da jakitea ez daudela bakarrik”.

IDOIA QUILES

Diagnostikoa jasotzean jendeak zalantzak izaten dituela nabarmendu du Gipuzkoako Accu elkarteko presidenteak: “Helduak askoz informatuago daude, baina sarritan zalantza juridikoak izaten dituzte horiek ere, desgaitasunei dagokienez, batik bat”. Informazioaz aparte, laguntza psikologikoa ere ematen dutela adierazi du Quilesek: “Ezinbestekoa da lan hori ere”.

Gaixotasunak eragindako arazo psikologikoei aurre egiteko, talde profesionala dute elkartean, eta ematen duten laguntza bakarkakoa edo taldekoa izan daiteke. Taldeko saioak “onuragarriak” izaten direla dio elkarteko presidenteak: “Aurrean dagoen pertsonaren egoera entzunda, askoz errazagoa da guztiona ulertzea”. Horrez gain, boluntario talde bat dute elkartean, “bertara lehendabiziko aldiz joaten diren pertsonei harrera egin ahal izateko”. Gaixoa boluntarioekin egoten da lehenengo, eta psikologoarekin hitz egiten du gero.

Gaixoari laguntza emateaz aparte, senideei eta lagunei ere egiten diete arta elkartean. Izan ere, gaitza dutenak ez dira izaten zalantzak dituzten bakarrak. Gaixoen familiei ere asko aldatzen zaie bizitza. Gipuzkoako Accu elkarteko arduradunak uste du une horretan “ahal den laguntza guztia” eman behar dela: “Denek dute lekua gure elkartean: gaixoek, haien lagunek, senideek…”.

Kanpaina eguneratu nahian

Pandemia hasi aurretik Beharra Daukat kanpaina garatu zuen Gipuzkoako Accu elkarteak, eta Quilesek zehaztu du orain kanpaina hori eguneratu nahi dutela: “Saltoki batzuei eranskailu bat eman genien, erraz ikus daitekeen leku batean jartzeko. Horrela, gaixoek badakite saltokian edo tabernan sartzean zuzenean komunera joateko aukera dutela, inolako azalpenik eman beharrik gabe. Gainera, komunak modu egokian egongo direla ere bermatzen du pegatinak”.

Utzi erantzuna

Zure e-posta helbidea ez da argitaratuko.

Ondorengo XHTML etiketa eta atributuak erabil ditzakezu: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>

6 + 5: