Nola egiten dute amodioa baserriko neskatilek / berotasun asko daukate gorputzean / neskatilak jarraitu behar dira / baso barrura sartzen dira / Basajaun bat bilatzera / iluntzean entzuten dira atsegin intziriak / beti eskatzen, beti eskatzen / inoiz ez dira asebetetzen [...]". Emakume baten ahotsa eta erritmo alaia, country ukituarekin. Neskatila alaiak izeneko abesti hori izan zen Zarauzko OK Korral musika taldearen abestirik ospetsuena. Hala uste du Dani Ulaziak (Zarautz, 1959), talde horretako gitarra jotzaileak. Bidegile izan ziren country eta rock doinuak euskaraz eskaintzen, 1983tik 1990era. Taldean beste zenbait kide ere egon ziren,baina, oro har, honako laukote honek osatzen zuen OK Korral: Ulaziarekin batera, Lou Olanguak (ahotsa), Iñaki Brakamontek (baxua) eta Alberto Inzak (bateria). Zarauztarrak guztiak. "Country eta rockabilly estiloko talde gehiago bazegoen, baina euskaraz ez zegoen ezer garai hartan", dio Ulaziak. Ile gandorrak, country giroko arropak... Musikarekin lotutako estiloa taularatzen zuten askotan; baina ez omen zuten ispiluaren aurrean denbora askorik igarotzen, baten batek izan ezik: "Lou abeslariak, esaterako, prestatzeko denbora dezente behar izaten zuen, kar-kar-kar. Argazkilariak ere, gehienbat, Louren bila ibiltzen ziren". Zazpi urte haietan, kontzertuak emateaz gain, bi disko kaleratu zituzten: OK Korral aurrena, eta Beti gogor beti mozkor gero.

"Bitxia da, baina Gipuzkoan baino kontzertu gehiago ematen genituen Bizkai aldean", esan du zarauztarrak. Gogoratzen da Bilbon saio asko egiten zituztela, baita Bilbo inguruko herri txikietan ere. Bizkaian ez ezik, Ipar Euskal Herrian ere aritzen ziren: "Herrietako festetan ematen genituen kontzertuak, eta giro oso polita sortzen zen". Espainian ere kontzertuak emandakoak dira, Madrilen, Zaragozan eta beste hainbat tokitan. Beste garai batzuk zirela uste du Ulaziak: "Gurearen moduko talde txikiek aukera gehiago zuten kontzertuak emateko: gaztetxe gehiago zegoen, tabernak ere gehiago mugitzen ziren, eta taldeak ere ez ziren horrenbeste. Gaur egun, talde pila bat dago herri guztietan".

Beraien musika bestelakoa izan arren punk mugimenduarekin orpoz orpo ibili zirela azaldu du zarauztarrak: "Garai hartan, punk musika asko entzuten genuen: Ingalaterrako The Clash eta Jam taldeak, esaterako. Hemen ere indartsu zebilen mugimendua, eta guk ere bagenuen filosofia hori; nik ez nuen musika ikasketarik, eta teknikoki txarrak ginen, baina beste xarma bat genuen". Uste du OK Korralek estilo berezia zuela, punkaz gain rock gogorra eta rockabillya ere entzuten baitzituzten: "Lehenengo diskoa countryagoa izan zen, baina bigarrenak nahasketa handiagoa zuen. Zuzeneko emanaldiak ere indartsuagoak ziren". Taula gainean ere askotan egin zuten topo punk mugimendukoekin. Besteak beste, Kortaturekin eta RIPekin batera kontzertuak emanak dira. Gainera, Kortaturen hasiera gertutik ezagutu zuten: "Gogoan dut Kortatuk gurekin batera jo zuela bere lehen kontzertua. Hernanin izan zen. Gero, sekulako arrakasta lortu zuten, baina orduan ez ziren hain indartsuak", dio irribarretsu.

Gainerako musika taldeen antzera, OK Korralekoek ere edozein baldintzatan ematen zituzten kontzertuak; batzuetan, doan; zerbaiten truke hurrengoan. "Guretzat, garrantzitsuena zen larunbatero kontzertu bat ematea", dio.

OK Korralen musikan "doinu alaiak ziren nagusi". Bereziki lehenengo diskoa dantza egiteko modukoa zela uste du Ulaziak. Bigarrenean, berriz, doinu rockeroagoak sartu zituzten: "Pixka bat desberdina izan zen". Hala ere, kontzertuetan "jendea mugitu egiten zen". Gogoan duen kontzertuetako bat Zarautzen bertan emandakoa da. Kontzertua antolatu zuten NATOren aurka, gaur egun gaztelekua dagoen frontoian, eta hantxe izan zen OK Korral, Cicatriz eta halako taldeekin batera. "Jende pila bat joan zen, eta kontzertu indartsua izan zen". Bitxikeria eta guzti amaitu zen saio hura, gainera: "Kontzertua amaitu, dena jasotzen hasi, eta baterian gehien erabiltzen den pieza falta zen: kaxa. Guk badakigu zeinek lapurtu zigun, baina ez dut esango!", kontatu du, barrez.

Madrilen futboleko final baten harira ere eman zuten kontzertu bat zarauztarrek: "Realak Errege Kopako finala jokatu behar zuen Madrilen, Bartzelonaren kontra, uste dut, eta festa antolatuta zeukaten partidaren ondorenerako. Gu eraman gintuzten kontzertua emateko. Tamalez, Realak galdu egin zuen, eta festara ez zen jende askorik etorri, kar-kar". Hala ere, finaleko partida ikusteko aukera izan zuten, sarrerak ere eman baitzizkieten.

Azken kontzertua, berriz, 2005ean eman zuen OK Korralek. Hamar urte bat baino gehiago zeramatzan geldirik taldeak, baina Zarauzko Putzuzulo gaztetxeak elkartu zituen berriro: "Entsegu batzuk egin genituen, eta oso ondo pasatu genuen kontzertuan. Jende pila bat elkartu zen gaztetxean; batzuek lehenagotik ezagutzen zuten gure musika eta beste batzuek ez, eta harrituta gelditu ziren".

Pariak Bai musika taldean orain

Ulaziak ez ditu gitarrak astindu OK Korralen bakarrik. Aurrez, Humedecidos taldean ibilia zen, eta OK Korral desagertu ondoren Labanak taldean aritu zen bost urtez. Gero, musika alde batera utzita eduki du, "tarteka" musikari tokia egin badio ere.

Orain urtebete, ordea, bete-betean sartu zen beste musika proiektu batean. Ordurako, bere bidea egiten ari zen Zarauzko Pariak Bai musika taldea. Folk, country, blues eta halako estiloak lantzen dituzte euskaraz, modu akustikoan. "Ez da OK Korralen oso desberdina. Hain zuzen ere, OK Korraleko hiru kanta jotzen ditugu Pariak Bain. Badu zerikusia, bai". Gainera, Iñaki Brakamonte ere bada taldeko kide. Beste hiruk osatzen dute Pariak Bai taldea: Iñigo Manzisidor Mantxi-k, Iker Lopetegi Lope-k eta Kepa Izetak. Kontzertuak ematen ari da boskotea, eta kantu berriak prestatzen ere bai. Orain dela gutxi, Zarauzko Garagardo Azokan jo zuten kontzertua, eta asteburu honetarako ere badute plana. Izan ere, bihar Oiartzunen arituko dira: Makutxo tabernan emango dute kontzertua, 22:00ak aldean. Ulaziak ondo asmatu du garai zaharrak eta berriak uztartzen, baina aldeak ondo gogoan ditu: "Vista Alegreko lokaletan hiru talde hasi ginen; orain, estilo bakoitzeko talde mordoa dugu herrian".

Denboraren makinan sartu eta atzera egiterik balego, garai eta geografia guztietan egongo litzateke norbait haur txiki bati kantatzen. Umeari abestea harekin egoteko aitzakia da, magalean estutzeko aukera, gaitasunak era naturalean garatzeko bidea. "M...

Gipuzkoako Eskola Txikietako Guraso Elkarteen Koordinakundeko Mikel Olanoren esanetan, Alkizaren antzeko egoeran beste hainbat herri eta auzo daude Gipuzkoan: Lizartza, Olaberria eta Oikia, besteak beste. Hala ere, egun, eskola txikien lehen arazoa ir...

Euskal Telebistako lehen urteak ziren haiek, eta Funtzioa programak eman zuen ezagutzera Olga Bidaurreta (Amasa-Villabona, 1968). Modelo lanak egiten ari zen, eta 1989. urtean eman zuen saltoa telebistara. Hiru urtez aritu zen lanean Xabier Otaegi Txi...

EHUko Gipuzkoako Campuseko Ikasleen Kontseiluko buru kargua hartu berri du Adrian Llorente Aginagaldek (Donostia, 1989). Esan du unibertsitatean hasi zenetik hasi zela ikasketez harago mugitzen, eta "halabeharrez" ikasi duela ikasketak eta bestelako zereginak uztartzen. Medikuntzako bosgarren mailako ikaslea da.

Gipuzkoako Ikasleen Kontseiluan aldaketa bat izan da. Zergatik?

Iaz eratu zen Gipuzkoako Ikasleen Kontseilua. Orduan egin zen araudiaren arabera, kontseiluak zuzendaritza batzorde bat behar zuen, eta, orain arte, hori ez da garatu. Zuzendaritza horretan, unibertsitate zentroetako ikasle kontseilu guztien ordezkaritza dago: Ibaetakoa, ospitaleetakoa eta Eibarko Ingeniaritza Eskolakoa. 13-14 kide inguru gara.

Nola dago eratuta kontseilua, eta zein funtzio ditu?

Esan bezala, 13-14 kide gara denera, eta horietatik lauk osatzen dugu talde eragilea. Ibaetako campuseko ikasleen kontseiluak ordezkatzea da gure zereginetako bat, eta, horrez gain, koordinazio lana egiten dugu beste zentroetako ikasle kontseiluen artean; gainera, ahal dugun neurrian, campuseko ikasleen arteko dinamizatzaileak ere izan nahi dugu. Orain, bitartekariak gara zentroetako ikasle kontseiluen artean eta EHUko ikasle kontseilu nagusiaren artean. Egoeraren arabera, hilean behin edo bi astean behin bilerak egiten ditugu. Egoera ez da erraza, eta zentroetako ikasleen kontseiluetako ordezkariek dituzten arazoak ekartzen dituzte aztertzeko eta, konpontzeko biderik balego, horri eusteko. Guk ez dugu irtenbiderik ematen; bitartekari lana egiten dugu.

Zuen ardatzetako bat da ikasleen elkarlana bultzatzea. Nola egiten da hori?

Sumatu dugu unibertsitateko ikasleen mugimendua geldirik dagoela. Horren gaineko plan bat garatzen hasi gara, eta, horretarako, ardatza da ikasleen elkarteak sortzea eta sustatzea, eta ikasleen arteko topaketak egitea. Ahal den heinean zentroetako ikasle kontseiluen jardunari laguntzea ere bada gure asmoa, horietako asko makal daudelako.

Zuen lanerako esparrua, ordea, ez duzue soilik mugatzen ikasketa eremura. Gizarte eragile ere izan nahi duzue.

Adibidez, Gipuzkoako unibertsitate ikaskuntzak dituen ezaugarrietako bat Junior Enpresak egitasmoa da. Hori ez dago ez Bizkaian, ez Araban. Gure asmoa da Junior Enpresa horiek bultzatzea; alegia, unibertsitatearen barruan dauden enpresa txiki horiek indartzea —fakturatzeko ahalmena dutenak—. Ikasleak lan mundura gehiago gerturatu nahi ditugu horrela. Beste helburu bat da ikasleen ordezkaritza elkarteak bultzatzea; horren adibide dira Medikuntzako Ikasleen Batzordea eta Ikasle Abertzaleak. Azkenik, prest gaude gizarteari oro har laguntzeko, zenbait boluntario egitasmoren bitartez.

Zeintzuk dira egun unibertsitateko ikasleen ezaugarriak?

Nik uste dut ikasleek, unibertsitatea barru-barrutik ezagutzen ez duten arte, ez dutela izaten unibertsitate ikasleen profil apropos bat. Estereotipoak daude: asko ikasten duten gazteena, edo festazaleak diren gazteena. Baina gizartearekin inplikatuta dagoen ikaslearen irudia ez da ezaguna. Unibertsitatearen erraiak ezagututa, ikasleak konturatzen dira egitasmo asko daudela unibertsitatearen barruan, ez oso ezagunak, beharbada. Adibidez, boluntariotza asko lantzen da, baita nazioarteko kooperatibismoa ere. Guk, Medikuntzako ikasleok, Adams izeneko egitasmoa abian jarri dugu berriki. Horrez gain, irakasle ikasketak egiten ari diren azken urteko ikasleen artean, ohikoa da kooperatiba ekintzak egitea garatzeko bidean dauden herrialdeekin. Nik uste dut mugitzen garela, baina hori ez da jakiten, eta gehiago mugitu behar dugu.

Espainiako Gobernuak proposatu du murrizketak egitea eta tasak igotzea unibertsitate eremuan, besteak beste. Zein iritzi duzue horretaz?

Egia esateko, ez dago batere garbi Espainiako Gobernuaren erabaki horiek nola eragin diezaioketen Euskal Herriko Unibertsitateari; izan ere, EHUn Euskal Autonomia Erkidegoko legedia dago, eta uste dut Jaurlaritzako Hezkuntza sailburuak ere ez duela guztiz garbi gai hori. Hori esanda, ikasleen kontseiluek egin beharko luketena da neurri horiek garbi daudenean horien gaineko informazioa eman, har litezkeen neurriak adostu, eta unibertsitate barrutik egin daitekeen guztia egin; alegia, Gobernu Kontseilura proposamenak eraman, irakasleen eta bestelako langileen sindikatuekin ados jarri, eta indarra egin errektoreak hein batean ere indarra egin dezan neurri horien kontra Hezkuntza sailburuaren aurrean.

Donostiako campusean pil-pilean dago TAOren gaia.

Orain, konponbiderik ez du TAOren gaiak. Donostiako Udalak ez du aldaketarik jaso TAOren ordenantzan; beraz, berdin eutsiko zaio; hau da, Ibaetan TAO egongo da aurrerantzean ere. Guk ez daukagu eskumenik hori aldatzeko; Donostiako Udaleko alderdi politikoen esku dago ordenantza hori aldatzea. Ez gara haiekin bildu, eta unibertsitateak itxitzat eman du gaia. Hala ere, urratsak egin dira aurrera alde horretatik: autoak uzteko toki gehiago jarri dituzte. Beste gai garrantzitsu bat da garraio publikoarena. Herrialde barruko herrietako garraio publikoaren eskaintza hobetu behar da, bereziki: linea gehiago behar ditugu, eta horiek maiztasun handiagoa izatea. TAOren gaia garrantzitsua da, baina garraioaren gabezien ondorioz da horren zaila autoa aparkatzea.

Gipuzkoako ikasleen arteko topaketa prestatzen ari zarete; zergatik?

Orain, martxan hasi berriak garela, iruditzen zaigu ikasleok elkartu egin behar dugula, alderdi ludikotik zein ikasketa alorretik badugulako zertaz hitz egin. Proposamen asko ditugu buruan, mota guztietakoak. Besteak beste, gure zereginetako bat da unibertsitateko bizitza kulturala indartzea, eta, alde horretatik, proposamen asko ditugu mahai gainean eztabaidatzeko; tartean, musika banda bat osatzea.

Alkizako Eskola Txikiaren eraikin berria ez da sartzen Eusko Jaurlaritzako Hezkuntza Sailaren lehentasunen artean; lursailak ez omen ditu betetzen, azalerari dagokionez, haiek eskatutako gutxieneko baldintzak, eta inbertsio hori egiteko ez da, gainera...

Errepideen finantzaketaren, errepide sarearen kudeaketaren eta diputazioak esparru horretan duen "defizit" ekonomikoaren berri emateko, kanpaina bat abiatuko du Gipuzkoako Foru Aldundiak, Larraitz Ugarte Azpiegitura diputatuak eta Joseba Altube depart...

Zumaian gazteek Erkibe eraikina okupatu zuteneko garaiari buruzko hitz onak besterik ez ditu Jon Maiak (Urretxu, 1972). Ni ere han izan nintzen kanpainarekin bat egin dutenetariko bat izan da bertsolari zumaiarra, gaztetxeak iraun zuen urtebete hari b...

Ramon Agirre eta Inaxio Tolosa, Ramon eta Inaxio ez baina, Ray eta Nick bihurtzen dira Xentimorik gabe antzezlanean. Honorioren aholkuari jarraituz —eta Honorio nor den ez badakite ere—, etxera, Euskal Herrira itzultzea erabakiko dute Ray eta Nick artistek. Ikuskizun eroa da Xentimorik gabe, antzerkia, musika eta umore ona uztartzen dituena. Gaur, Beasaingo Igartza jauregian ikusi ahal izango da, 19:30ean.

2008an eraikin bat okupatu zuten ehun gazte inguruk Zumaian. Herriaren erdiguneko Erkibe etxera sartu —1999tik hutsik zegoen —, eta gaztetxe izendatu zuten. 2008ko uztaila zen. Egun gutxi barru, ertzainak sartu eta han zeuden hamar gazte identifikatu zituzten. Okupazioak urtebete gehiago iraun zuen, baina orain hamar gazte horiek auzipetuta daude. Azpeitiko Epaitegitik jaso zuten gutuna: fiskalak 1.500 euroko isuna eskatzen du auzipetu bakoitzarentzat, legez kontra eraikin batean sartzeagatik. Erkibe etxearen jabeek, berriz, 80.000 euroko kalte-ordaina eskatu dute "eraikinak jasandako kalteengatik" eta etxea okupatzeagatik. Epaiketa egingo dela jakin arren, ez dakite noiz izango den.

Isunei dagokienez, auzipetuek azpimarratu dute akusazio partikularrak ez duela arrazoirik 80.000 euroko kalte-ordaina eskatzeko: "Eraikinean apurketak egon zirela dio etxearen jabeak, baina irudietan argi ikusten da eraikin hori okupatu zen egunean ere egoera oso txarrean zegoela, hamar urtetik gora zeramatzalako hutsik", azaldu du Maddi Gallastegi auzipetuak. Gainera- tu du eraikina txukundu egin zutela: "Hormak margotu ziren, dena garbitu zen, eta sotoan zutoinak jarri ziren, erortzeko arriskuan zegoelako".

Gazteek Ni ere han izan nintzen kanpainarekin erantzun diote isunaren mehatxuari. Auzipetuak hamar izan arren "erasoa denen kontrakoa" izan zela azaltzea da helburuetako bat: "Ertzainak sartu zirenean hamar lagun geunden, baina Zumaiako gazteria osoaren aurkako erasoa izan da". Horregatik, kanpaina ez dute irudikatu nahi izan hamar gazteren inguruan, "herriko gazte guztiek aurrera eramandako kanpaina baten gisan" baizik. Hala, hainbat ekintza egin dituzte elkarlanean. Esaterako, sinadura bilketa egiten dute larunbatero Zumaian, eta txandak antolatu dituzte mahaiak jartzeko. "Denok sentitzen dugu epaiketaren zama gainean, baita erantzukizuna ere aurrera egiteko", azaldu du Gallastegik. Oraingoz, 540 sinadura bildu dituzte. Gainera, gaur egungo Torreberri gaztetxean antolatzen diren ekintzetatik diru kutxa bat osatzen ari dira, isuna egongo balitz hari aurre egiteko.

Sinadurez gain, eta kanpainaren barruan, herriko hainbat pertsona idatziak egiten ari dira gero komunikabideetara bidaltzeko. "Herriko hainbat eremutan mugitzen diren gazte eta ez hain gazteek astero komunikabideetara idatzi bat bidaltzea zen gure asmoa, kontatzeko haiek nola bizi izan zuten gaztetxeak iraun zuen urtebete hori". Besteak beste, Jon Maia bertsolariak, Beñat Lizeaga euskal presoak eta Ikasle Abertzaleetako eta Dardara musika kolektiboko kideek egin dute euren ekarpena. Idatziak www.galernasarean.info webgunean irakur daitezke.

Mezu baikorra

Pozik daude orain arte herritarrengandik jasotako erantzunarekin. Igaro berri diren San Telmo jaietan ere hainbat ekintza egin zituzten, eta "400 pertsonatik gora" elkartu zituzten herri bazkarian. "Pixkanaka ari da gaia herritartzen, eta alde horretatik pozik gaude". Gallastegik gaineratu du udalak ere kezka eta laguntzeko prestasuna agertu dituela, eta mahaia jartzen dutenean herritarrak galdezka joaten zaizkiela. Gallastegik uste du gaztetxeak iraun zuen urtebetean egindako lanak "bere fruitua" eman zuela, eta herriari "ekarpen handia" egin ziotela. Hain zuzen ere, 2009ko urritik gaztetxe finkoa dute, udalarekin hitzarmen bat sinatu ondoren: "Gaur egun, Erkibetik bi minutura dagoen eraikin batean dugu gaztetxea, Torreberrin. Denak animatu nahi ditugu gaztetxean parte hartzera. Guk berdin-berdin jarraituko dugu lanean; izan lau hormen artean, izan kalean, izan kristalezko jauregi baten barruan [orain dauden eraikin berriari erreferentzia eginez]".

2008ko uztailaren 9an sartu ziren Erkibe etxean ehundik gora gazte; Eman o hartu lelodun elastiko urdinak zituzten soinean. Gaztetxea sortzea zen asmoa, eta, lehen egunetik, hainbat ekintza egin zuten han. 2009ko uztailaren 24an bidali zituzten handik ertzainek. Ordurako, Zumaiako Udalarekin hitz eginda zeuden, bota egingo zituztela jakitun. Udalak Torreberri eraikinaren zati bat eskaini zien, eta han du Zumaiak gaztetxea 2009ko urritik.