Gaur egingo dute Gipuzkoako Argazkilari Elkartearen Nazioarteko Gipuzkoa Trofeoa lehiaketaren sari banaketa, Donostiako Antzoki Zaharrean, 19:00etan. Sariketan parte hartu duten 35 argazkirik onenen erakusketa ikusgai dago Gipuzkoako Argazkilari Elkartearen egoitzan, Donostian, otsailaren 23ra arte.

1963an sortu zuten Elgoibarko Izarra elkartea, euskara eta herria hauspotzeko. Etena izan zuten 1980tik 1994ra. Ohiturari eutsita, kantuan ariko dira bihar, Santa Ageda bezperan; han izango da Imanol Larrañaga elkarteko kidea ere.

Donostiako Kresala dantza taldeak 'Hitaz orhoit' ikuskizuna estreinatuko du otsailaren 9an, ostegunean, 19:30ean, Hernaniko Biteri kultur etxean. Emakumeak ardatz hartuta, 1920-1930eko hamarkadetako "gatazka zibilen inguruko hausnarketa bat" proposatuko du ikuskizun berriak.

Urteetan jasotako eta gordetako bertso grabazioak transkribatzea erabaki zuen Xabier Unanuek duela ia hogei urte. 42.000 bertso baino gehiagoko bilduma osatu, eta Zestoako liburutegiari utzi dio.

Donostia Musikak Franz Schubert musikari austriarrari buruzko zikloa egingo du igandetik azaroaren 12ra arte. Viktoria Eugenian eta Antzoki Zaharrean izango dira saioak.

Danbaka Debagoieneko musika lehiaketaren finala izango dute gaur, 21:30ean, Bergarako Seminarixoa aretoan. Iazko urriaren 14tik, hogei taldek hartu dute parte lehiaketan, eta hiru igoko dira gaur oholtzara: Aiert Alberdi oñatiarra, Arragoa Bergarako taldea eta The Clayton Aramaiokoa.

Zinema aretoek publikoaren %43 galdu dute 2019tik, EZAE zinema areto pribatuak biltzen dituen elkartearen datuen arabera. Antzeko joera dute eskumen publikoko aretoek ere.