Atzegik kanpaina bat aurkeztu berri du adimen desgaitasunen bat dutenak modu independentean bizi daitezkeela aldarrikatzeko.
Bi urte bete ditu Goi Osasun Lab egitasmoak, mendekotasunik ez duten adinekoen bizi kalitatea hobetzeko programak. Beasainen, Ataunen eta Itsasondon jarri zuten martxan.
Baratze ekologikoetan ari direnek gainkarga dutela, oporrak egiteko zailtasunak, aitortza txikia, eta prezioak ere apalegiak direla maiz: horiek dira Duina ikerketaren ondorioetako batzuk. Dena den, Leire Ibarretxe Biolurreko teknikariak azaldu du ikerketan parte hartu dutenak "pozik" daudela beren jarduerarekin.
Paradisu ihes gela pedagogikoa martxan da Orioko Iturriaga jauregian, azaroaren 30era arte. 2023ko urtarrilaren 27tik martxoaren 31ra, berriz, Beasainen izango da aukera. Sorginlore gizarte elkarteak, Ikertze kultur elkarteak eta Experientziak taldeak elkarlanean sortutako proiektua da.
Irailaren amaieran, herri galdeketa bat egin zuten Astigarragan, Gabonetako argiak jarri ala ez erabakitzeko. Nahi zituztela esan zuten herritarrek. Egungo egoera energetikoa dela medio, argiekin zer egin aztergai izan dute beste hainbat herritan ere. Murrizketa txiki batzuk iragarri dituzte gehienek.
Lehen aldiz, Baliarraingo Gazte Eguna antolatu dute herriko gazteek, gaurko. 155 biztanle besterik ez ditu herriak. Garagardo dastaketaz gain, afaria eta musika izango dituzte.
Beste toki askotan bezala, Gipuzkoan ere ugaritzen ari dira helduentzako soilik diren hotel, nekazaritza turismo, pentsio eta jatetxeak. EAEko Turismo Legea oinarritzat hartuta, diskriminazio zantzuak egon daitezke, baina gaiaren inguruko zalantza asko dago aditu batzuen artean. Helduentzako soilik egokituta dauzkate Eibarko Sosola nekazaritza etxea eta Mutrikuko Arbe hotela. Gisasolak, Sosolaren jabeak, hasieratik hartu zuen erabakia; hotela ireki eta bi urtera Iñaki Arinek, Arberen jabeak.
Jende gutxik egin ohi du oraindik ere aurretiazko borondateen agiria. Arantza Garaialde Duintasunez Hiltzeko Eskubidea elkarteko kideak esan du zer nahi den idatzita eta erregistratuta utzi ezean, tokatzen den medikuaren borondatearen mende egon daitekeela.
Seabin Pasaia gailuak bi urte daramatza Pasaiako badian hondakinak biltzen. Txikia den arren, hirurehun kilo zikinkeria jasoa du jada, Pasai San Pedroko ontziralekutik mugitu gabe. Bildu dituen gehienak mikroplastikoak dira.
Aurten, lehen aldiz, gizonentzako tailer bat emango du Oñatiko Udaleko Berdintasun Sailak: 'Gizonak feminismorantz'. Joseba Gabilondok gidatuko du lau saioko ikastaroa.
