Aspalditik dira bertsozaleak Laxaro Azkune, German Zelaia eta Haizea Arana, eta aurtengo Bertsolari Txapelketa Nagusiko lehen faseko ia saio guztietara joan dira hirurak. Bost urteren ondoren, "ilusioz" hartu dute txapelketa, aukera eskaintzen duelako lagun zaharrekin egoteko eta udazkeneko asteburuak beste modu batean antolatzeko.
Zumarragako musika bandak ezohiko kontzertu bat emango du urriaren 23an: bi emakumek zuzenduko dute banda, eta emakumeek sortutako obrak joko dituzte, errealitate bat ikusarazteko asmoz.
Loraldi eta gainbeherekin, baina 70 urtean asmatu du aurrera egiten Eibarko Arrate kultur elkarteak. Urtemuga baliatuz, "abiapuntu bat" jarri nahi dute, ikusteko herrian zer bide egin daitekeen kulturgintzan. Elkarteko koordinatzailea da Aniaiz Ariznabarreta.
Kirol egokitua eta pasio duen rock musika uztartuta, Errebeldeak Fest jaialdi inklusiboa antolatu du Ibon Casas donostiarrak. Bihar egingo dute jaialdia, egun osoz, Hernanin. Hiru gune prestatu dituzte: Sagastialde, Atsegindegi eta Tilos.
Gazteriaren Pirinioez Gaindiko II. Foroa egin dute Hondarribian, irailaren 29tik urriaren 2ra. Klima aldaketaren gaineko lankidetza proiektuak abiaraztea izan da helburu nagusia.
38 eta 44 urte artean izan ohi den "krisialdi unibertsalaz" ariko da Izaro Susperregi astrologoa urriaren 19an, Tolosako Amarozko auzoetxean emango duen tailerrean.
Azaroaren 18tik abenduaren 2ra izango da aurtengo Euskaraldia. Aurretik ere hainbat jarduera egiten ari dira herriz herriz, ondoren ariketa hori ahalik eta ondoen egin ahal izateko, eta jendea parte hartzera animatzeko.
Pausoz Pauso programa jarri dute martxan Donostian, haurren gehiegizko pisua tratatzeko.
