Gaur egingo dute Gipuzkoako Argazkilari Elkartearen Nazioarteko Gipuzkoa Trofeoa lehiaketaren sari banaketa, Donostiako Antzoki Zaharrean, 19:00etan. Sariketan parte hartu duten 35 argazkirik onenen erakusketa ikusgai dago Gipuzkoako Argazkilari Elkartearen egoitzan, Donostian, otsailaren 23ra arte.
Gogoa Mobility Robots enpresak Movex Living Lab laborategia inauguratu berri du Urretxun. Exoeskeletoek lagunduta, errehabilitazio lana egiten lagunduko diete mugikortasun arazoak dituztenei.
Premia bereziak dituzten Lanbide Heziketako ikasleen inklusioa bermatzeko proiektu aitzindari bat hasi dute Errenteriako Don Bosco LHIIk, Tolosaldea LHIIk eta Dislegi elkarteak.
Aktore lanetan hasi zen Nerea Garmendia, baina interpretazio munduko beste adar batzuetara egin du jauzi: aurkezle, bakarrizketalari... "Guztietan gozatzen dut". Era batera edo bestera, ikusleen irribarrea du xede.
Datozen hilabeteotan aurkeztuko ditu Eusko Jaurlaritzak gaitasun handiko ikasleak detektatzeko hartuko dituen neurriak. Aupatuz elkarteak uste du "aurrerapauso bat" ekar dezakeela, baldin eta lan hori egin behar dutenek "beharrezko prestakuntza" badute.
Astelehenetik greban daude Gipuzkoako Onkologikoa garbitzen duten hemezortzi langileak. Kale garbitzaileek baino %25 gutxiago kobratzen dutela salatzen ari dira.
Urtebete hondatuta egon ostean, estazio meteorologiko berria jarri dute Berastegin. Teknologiari esker, euria, txingorra edo elurra ari duen neurtu dezake gailu berriak. Egun, bederatzi tanta neurgailu soilik daude Araba, Bizkai eta Gipuzkoan.
1963an sortu zuten Elgoibarko Izarra elkartea, euskara eta herria hauspotzeko. Etena izan zuten 1980tik 1994ra. Ohiturari eutsita, kantuan ariko dira bihar, Santa Ageda bezperan; han izango da Imanol Larrañaga elkarteko kidea ere.
Donostiako Kresala dantza taldeak 'Hitaz orhoit' ikuskizuna estreinatuko du otsailaren 9an, ostegunean, 19:30ean, Hernaniko Biteri kultur etxean. Emakumeak ardatz hartuta, 1920-1930eko hamarkadetako "gatazka zibilen inguruko hausnarketa bat" proposatuko du ikuskizun berriak.
Bidasoa ibaiko izokina galzorian dagoela ohartarazi du Nafarroako Ingurumen Kudeaketak egindako azken txostenak. Azkeneko 37 urteetako daturik okerrenak dira.
