Zarauzko Putzuzulo gaztetxea aurki eraitsiko dute, etxeak egin nahi dituztelako. Asanbladako kideek jakinarazi dute handik ez direla mugituko beste leku bat ziurtatuta izan arte.
Urte amaieran udalerri bakar bihurtuko da Ezkio-Itsaso, Gorenaren ebazpenaren ondoren. Diputazioak eskaera aztertuko du.
Eguzki talde ekologistak neurriak hartzeko eskatu du linea elektrikoek hegaztiei heriotzarik ez eragiteko. Gipuzkoako basozainek urtean zehar 12-15 kasu inguru zenbatzen dituzte.
Faxistek Bidasoko 90 herritar deportatu zituzten 1936ko altxamendu militarraren ostean; 30 hil ziren kontzentrazio esparruetan. Indarrez mugitu zituztenen historia jaso du Kepa Ordoki memoria elkarteak, eta erakusketa bat osatu dute.
Irungo Udalak lehenengoz abiarazi du Iñigo Muguruza beka, eta Asier Suberbiolak eskuratu du. Horri esker, Muguruzaren musikan eta izatean sakonduko du, material pedagogikoa sortzeko.
Beratu musika jaialdia egingo dute asteburuan Oñatin. Kalitatezko eta gertuko plaza bat sortzea du helburu jaialdiak. Asteazkenean hasi behar zuten, baina ezin izan zuten lehen ekitaldia egin.
Ezinbesteko diru iturria da gaua zenbait sektoretako langileentzat. Etxeratze aginduak eta gainerako neurri murriztaileek eragin zuzena dute haien jardunean. Iturri hori itxita, berriak zabaltzea nahi dute, eta kaltetutako sektoreei begirako neurriak eskatu dituzte.
COVID-19ak eraginda, bertan behera geratzen ari dira jende asko elkartzen duten ekitaldiak, eta azoka bereziak ere ez dira salbuespen bat. Gipuzkoan, berrogei baino gehiago antolatu ohi dituzte azaro-abenduetan. Azoketan izaten diren ekoizleek diote diru iturri garrantzitsu bat galduko dutela.
Buruntzaldeako Gazte Sortzaileak egitasmoa sortu dute, eta aurkezpenak egiten ari dira eskualdeko herrietan. Bailarako sortzaileak ezagutarazteko eta saretzeko asmoz ekin diote proiektuari. Datu base bat ere ari dira elikatzen.
Egoerara egokituta eta baldintza berezietan, baina abian dira XXXVIII. Euskal Antzerki Topaketak, Azpeitian. Azaroaren 20ra bitarte, hainbat antzezlanez gozatzeko aukera izango dute herritarrek.
