Irungo Hirubide BHI ikastetxeko bost ikasle eta bi irakasle Errumanian izan ziren martxoan, Erasmusplus programari esker. Astelehenean, Errumaniako bost ikasle etorriko dira Irunera, eta haien lan metodologia irakatsiko diete irundarrei.

Osasungintza eta 36ko gerra elkartu ditu Jose Antonio Rekondo Bravo sendagile tolosarrak bere azken liburuan. Informazioa biltzea asko kostatu zaiola aitortu du. Sendagilea izan zuen aita, eta erizain boluntarioa ama.

Pasaiako Mater Ontzi Museo Ekoaktiboaren ekimenez, itsasoa eta hondartzak hondakinik gabe mantentzeko konpromisoa hartu du Zarauzko Udalak. 2030erako Eskola Agenda proiektuaren barruan, ikasleekin hondakinak biltzen aritu dira hemeretzi saiotan.

Garbiketako kamioiak 06:00etarako iristen dira Donostiako Parte Zaharrera, eta auzoan etengabeko zarata izaten dute egun osoan, Kattalin Ansorena auzoko bizilagunak esan duenez. Ostegunean protesta bat egingo dute.

Astelehenetik asteazkenera, zientzia gaiak tabernetan dibulgatzea sustatuko du Pint of Science jaialdiak. Hamahiru saio antolatu dituzte Donostian eta Errenterian.

Antzuolarrek prozesu parte-hartzaile bat hasi dute, heriotzaren gaia normal lantzeko. Nolako hilerriak nahi dituzten aztertuko dute herrian.

Gaixotasun degeneratibo bat zuen Pilarrek; horrez gain, iktus bat izan zuen eta ia erabateko mendekotasuna zuen. Eutanasia eskatu zuen. Prozesu guztian, haren mediku erreferente izan zen Mikel Baza.