Ziztaka proiektua sortu dute Irunen, euskararentzako eta kulturarentzako gune bat aurkitu nahian.
Oscar sarietarako lehian zebilen Jon Garaño, Aitor Arregi eta Jose Mari Goenaga zinemagileen 'La trinchera infinita' filma, baina ez da pasatu azken-aurreko fasera. Hala ere, "pozik" daude.
'Mendian hil, hirian hil' dokumentala ikusi ahal izango da, gaur Aretxabaletan eta bihar Eskoriatzan. Iñaki Peña medikua da zuzendaria, eta heriotzari buruzko hirugarren dokumentala du jada. Euskarazko filmik onenaren saria jaso zuen abenduan Bilbon, Mendi Film Festival jaialdian.
Tolosako aurtengo inauteriak oroimenean geratuko zaizkie gehienei, pandemia dela-eta ez baita festarik ospatuko. Mikel Arribillaga eta Marta Garcia konpartsazaleek desio dute hurrengo urtean jaiak berriz ere normal ospatu ahal izatea.
Euskal abestien, liburuen eta olerkien bilduma bat osatu dute Irakasle Eskolako lau ikasle ohik, unibertsitateko lanez baliatuz. "Bitarteko falta" nabari zuten hezkuntzan. Proposamen didaktikoak ere gaineratu dituzte.
'Leopoldina Rosa: gaur egungo istorio bat' erakusketa ikusgai dago, ekainaren 13ra arte, Donostiako Euskal Itsas Museoan; Euskal Herriaren XIX. eta XXI. mendeetako migrazioak parean jarrita hausnarketa eragitea da erronka.
Pasaia San Pedro Albaolarekin lotzen du Ondartxo pasealekuak, eta hura mozteak bideak itxi dizkio faktoriari. Pandemiak eta neguak ere eragin dutenez, behin-behinean itxi dute Albaola.
Otsailaren 9tik martxoaren 23ra arte egingo dituzte Eibarko Antzerki Jardunaldiak. Hitzaldi bat eta hemeretzi ikuskizun izango dira aurten. Antzokiak "toki seguruak" direla defendatu dute antolatzaileek.
Los Incansables txarangak iaz bete zituen 50 urte, eta, COVID-19aren eraginez ospakizunak itzalean gelditu ondoren, disko-liburu bat kaleratu berri dute, hainbat istorio, bitxikeria, argazki eta abesti bilduta. 1970etik txarangako partaide da Joaquin Ortega 'Canario'; Igor Agirre 2016an sartu zen taldean.
Euskadiko Orkestrak hamar kontzertu eskainiko ditu gaurtik otsailaren 9ra, 'Bizirik' zikloaren barruan; lehen seiak, Donostian. Ruth Reinhardt zuzendariaren eta Augustin Hadelich biolin jotzailearen estreinaldia izango da.
