Sorotan Bele taldeak sona handia izan zuen 1990eko hamarkadan, eta, lehen diskoko abestiak egokituta, 'Sorotan Bele gogoan' proiektua sortu dute Xabier Zabalak, Gorka Sarriegik eta Urbil Artolak. Hondarribian ariko dira etzi, 19:00etan.

Urtero, jazz musikaren eskaintzarik oparoenetako bat izaten da Donostiako Jazzaldia —uztailaren 21etik 25era egingo dute aurten—, baina ez bakarra. Goierriko Jazzaldia egingo dute, gaurtik igandera, Ordizian eta Araman, eta Arrasate Blues jaialdia hurrengo ostegunetik igandera.

Eromen Produkzioak konpainiak antolatuta, Zestoako Antzerki Astea egingo dute ekainaren 28tik uztailaren 4ra. Bost antzerki obra eta mahai inguru bat eskainiko dituzte.

Zumarragako Trikitixa taldeak mende bat eman du herrietako plazak, jaiak eta ospakizunak alaitzen. Aitzindariak izan dira gauza askotan, eta trikitiari ekarpen andana eginda bete dituzte ehun urte.

Zapla bertsolari gazteen zirkuitua sortu du Gipuzkoako Bertsozale Elkarteak, 18 eta 23 urte arteko bertsolariei plazarako jauzia egiten laguntzeko. Sei bertso eskolak beste hainbeste saio antolatu dituzte, eta hirugarrena izango da bihar, 19:00etan, Hernanin. Hiru gazte eta beteranoago bat: diseinu hori dute saioek.

Lierni Mendia margolariak 'Boligrafoz' erakusketa jarri du Tolosako Aranburu jauregian; Bic boligrafoekin sortutako lanak ikus daitezke bertan, ekainaren 12ra arte.