Euskadiko Orkestrak hamar kontzertu eskainiko ditu gaurtik otsailaren 9ra, 'Bizirik' zikloaren barruan; lehen seiak, Donostian. Ruth Reinhardt zuzendariaren eta Augustin Hadelich biolin jotzailearen estreinaldia izango da.

Hurrengo zazpi egunetan, bi bertso saio besterik ez daude programatuta Gipuzkoan: Bergaran eta Villabona-Amasan. Iaz, %55,6 egin zuen behera bertso saioen kopuruak.

Ana Mendiola donostiarrak 'Besarkadarako olerkiak' poema sortaren euskarazko bertsioa kaleratuko du laster. Modu berritzaile batean jaso ditu poemak: kartetan.

Trikiti doinurik gabe, Xabi Malbadi albizturtarrak soinu txikiarekin jotako zazpi pieza sartu ditu 'Zero' izeneko bere lehen diskoan. "Espero baino harrera hobea" izan du.

'Beste bat!' zirkuituaren barruan, Gipuzkoan 70 kultur emanaldi izango dira gaurtik otsail amaierara arte. Musika emanaldiak dira %80.

Euskalgintzak eta kultur arloak bi erreferentzia handi galdu dituzte aurten: Joan Mari Torrealdai eta Jose Luis Zumeta . Arantzazu, 'Jakin', 'Euskaldunon Egunkaria' eta Euskaltzaindia izan ziren Torrealdairen lau makuluak; espresionismo abstraktua eta figurazioa Zumetarenak.

Betzaida Urtaza legorretarrak bigarren ipuina argitaratuko du laster, euskaraz egin duen lehenengoa: 'Burrunba txoria'. Orain arte idatzi dituen bi ipuinek Amesgile argitaletxearen zigilua dute, legorretarrak berak sortu duen editorialarena.

Demode Produkzioak-ek sorkuntzaren arloan aritzeko gogoa zuen, eta 'Kutsidazu bidea, Ixabel' nobela aukeratu du musikal bat egiteko. Dramaturgia nahiz abestiak ikuskizunerako propio sortuak dira.