Josu Artutxa Dorronsoro
Zortzi hamarkada egin behar dira atzera. 1939ko apirilaren 1a: hiru urtez Espainiako II. Errepublikaren aurka matxinatutako militarrek garaipena aldarrikatu zuten, ofizialki, Francisco Franco jeneralak eskuz idatzitako gerra partearen bitartez.
Aitziber Arzallus
Urteak dira Azpeitiko Emakumeen Txokoan Jabetze Eskolak antolatzen dituztela. Emakumeei euren buruaren eta bizitzaren jabe izateko erremintak eta baliabideak eskaintzea da eskola horien helburua.
Eider Goenaga Lizaso
Maria Lakunza, ikasgelan, Rosa Parks autobusean bezala irudikatzen du Luis Garbaio idazle eta kazetariak (Lizarra, Nafarroa, 1956): bakar-bakarrik. Izan ere, ikasketa prozesu osoan emakume bakarra izan zen gelan; bakarra batxilergoan, bakarra zuzenbide ikasketetan... Ibilbide profesionalean ere Lakunzak (Iruñea, 1900-1984) "genero bakardade izugarria" pairatu zuela dio Garbaiok.
Karmele Uribesalgo Alzola
227. greba eguna dute gaur Gipuzkoako polizia etxeetako eta epaitegietako garbiketa zerbitzuko langileek; irailaren 19an ekin zieten protestei. Greban dauden 30 langileetako bat da Nekane Zabala (Villabona-Amasa, 1973).
Kerman Garralda Zubimendi
Batzuetan, ordulariak azkarregi egiten du korrika, eta besteetan, motelegi. Egiari zor, denborak aspaldi topatu zuen bere gustuko erritmoa, eta fin eusten dio horri, baina Izazpin behera sufrikario betean hauspoa berobero daraman lasterkariak nahiagoko luke segundoak motelago igaroko balira; 500 euroko saria egoten da Ezkioko helmugan probako errekorra hobetzen duenarentzat, baina txekeak hauts apur bat du jada, 37 urte daramatza-eta nork jasoko zain.
Aurten bost saio izango dira Intxaurrondoko Ibiltariaren Astean. Etzi lehenengoa, eta ostiralean azkena. 18:30ean hasiko da etziko saioa eta 20:00etan gainerako laurak. Maiatzak 5, igandea Sueños y sabores. Helena Taberna eta Oraitz Garcia. Zaporeak elkarteak Atenasen egunero egiten duen lanari buruzkoa da filma. Gaztelaniaz emango dute, euskarazko azpidatziekin. Maiatzak 7, asteartea Papua Nueva Guinea. Iñaki Caperochipiren dokumentala. Australiatik iparraldera dagoen...
Danel Agirre
Ufologo bilakatzeko egitasmoarekin bateraezina zelakoan laga nion katoliko izateari. Erosi nituen lehenbiziko liburuak, 8 bat urterekin, Fernando Jimenez del Oso eta Juan Jose Benitezek idatzitakoak ziren. Gizabanako moduan kontzientzia osoa garatzeko ezinbestekoak diren bi heldulekuak eskaini zizkidaten, Elizak lehenago bezala. Egunerokoaren labirintoan ez galtzeko jomuga zehatza, betebehar benetan oinarrizkoa, batetik (izuagatik on egiten saiatzeari utzi, eta buru-belarri plater hegalariak bilatzera pasatu nintzen, nire kasuan). Bizitzaren misterioari erantzun behin betikoa, edo erantzun hori laster iritsiko zelako agintza behintzat, bestetik.
Unai Zubeldia
Bidaia bat barrutik bizitzeko, ez da beharrezkoa hegazkin txartela, maleta eta gida liburua ondoan izatea. Areto bateko aulkian eserita ere bidaia daiteke gaur egun, beste batzuek munduan barrena bizi izandakoak entzunez. Bidaiatzeko beste modu bat da hori. Bidaia bakoitzak txoko preziatu bat izaten du norberaren barruan, baina, duela 25 urte, esperientzia horiek gainerako herritarrei helaraztea ere "polita eta aberasgarria" izan zitekeela pentsatu zuten Donostiako Intxaurrondo auzoan.
Aitziber Arzallus
Luciano Juaristi (Azkoitia, 1932) da bizirik dagoen buruz buruko txapeldunik zaharrena. Bizirik eta sasoian dago, gainera. Ibilera bizkorra, buru argia eta hizketa garbia ditu, eta atzokoak balira bezala kontatzen ditu orain sei hamarkadako kontuak. Askorentzat inoizko pilotaririk onena izan zenaren, Mariano Juaristi Atano III.a-ren iloba da Luciano, atanotarretan hamargarrena, Atano X.a eta Atanillo gisa ezaguna.
Eider Goenaga Lizaso
Apirilaren 8an, Eneko Goia Donostiako alkateak Teledonostiren bidez erantzun zien metroko obrek kaltetutako Amara Zaharreko bizilagunen eskaerei: aurrerantzean obrak ez ziren gehiago gauez egingo.
