Arrosa irrati sareak hogei urte beteko ditu aurten. 26 irratik osatzen dute sarea, eta horietako bederatzi Gipuzkoan daude. Tartean, hamabost urte bete ditu Zarauzko Arraio irratiak.

2019ko abenduan sortu zuten Amak musika taldea, eta, urte eta erdi eskas geroago, beren lehen diskoa aurkeztuko dute, gaur, Alaitz Telletxeak, Maixa Lizarribarrek, Amaia Orejak eta Kristina Solanok, Donostian. Bihar bertan egingo dute lehen kontzertua, Bergarako Seminarixoan, 19:00etan.

Gaur jokatuko dute Gipuzkoako Eskolarteko Bertsolari Txapelketako azken saioa, Arrasaten; hor zehaztuko da zein sei bertsolari ariko diren finalean, maiatzaren 28an.

'Espazio kuttunak' erakusketa ikusteko aukera egongo da, gaurtik ekainaren 5era, Andoaingo Bastero kulturgunean. Gonzalo Etxebarria, Oaia Peruarena eta Iker Valle margolariek eta Patxi Laskarai argazkilariak elkarlanean sortutako proiektua da. Laurek 2011n ezagutu zuten elkar.

Duela 30 urte Ikertze sortu zutenek gauza bat erakutsi dietela dio De Miguelek: sorkuntzarako gaitasuna denek dutela, baina trebatu egin behar dela. Sorkuntzaz gain, kritikotasuna sustatzea dute xede elkartean.

Leku itxi batean egingo duten lehenengo Poligrafo Fest jaialdia izango da biharkoa, Urretxun. Zuzeneko musikaz gozatzeko aukera izango dute ikusleek. Sarrerak salduta daude jada.

'Hitz-artea' saioa egingo dute gaur, 19:00etan, Aretxabaletako Arkupe kultur etxean. Jokin Mitxelena ilustratzaileak zuzenean marraztuko du, sei narratzaileren irakurraldiak entzunez.